Maxkamadda Darajada Koowaad ee ciidamada Qalabka sida ayaa shalay soo gabagabeysay kiiska koox ka tirsan Alshabaab oo qaabileysaneyd khaarijinta iyo dilalka dadka, kuwaasoo uu ka mid ahaa madaxii kooxdaasi Maxamed Xaaji Axmed (Daahir, Xudeyfi, Caddaawe- Ilkacase…)
Ninkan ayaa ahaa maamulaha iyo isku-xiraha kooxdan wuxuu la baxay magacyada Daahir, Xudeyfi, Cdaawe iyo Ilkacsse oo markii danbe loogu yeeri jiray, isagoo ka qeyb qaatay dilalka saraakiil sare oo ka tirsan ciidamada Booliska, waxaana dhalay sarkaal ka tirsan ciidamada Booliska, isagoo uu soo koriyey adeerkiisa oo iska Jeneraal Boolis ahaa.
Eedaha loo soo jeediyey Shuceyb ama Ilkacase ayaa muujinaya sida uu halis u ahaa, iyadoo lagu tilmaamay eedeysanaha ugu naxariista darnaa ee u gacan gala Hay’adaha ammaanka dowladda, kadib markii lagu eedeeyay inuu dilay adeerkiis soo kordhiyey oo uu gurigiisa ku noolaa Ex. Jeneraal Ismaaciil Axmed Cusmaan, iyadoo mar uu gacan galay dowladda uu damiin kusii daayey aabihii oo isna sarkaal Boolis ah.
Xeer ilaalinta Maxkamadda Ciidamada ayaa sheegay inuu ninkan ku eedeysan yahay khaarijinta saraakiil sare oo ay ka mid yihiin: Jen. C/llaahi Maxamed Sheekh Xasan Qurux oo la dilay Bishii Septembar 2017. Xeer ilaaliye ku xigeenkii dowladda Maxamed C/raxmaan Maxamuud oo la dilay Bishii Febraayo 2019 iyo Ex. Jeneraal Boolis Maxamuud Xaaji Cali oo isna la dilay Bishii April 2019.
Ilkacase oo madax u ahaa howlgallada Magaalada Muqdisho ay ka fuliso Alshabaab ayaa qaraxyada iyo dilalka uu abaabulay la sheegay inay ku dhinteen dad ka badan 180 qof, waxaana qaraxyadii uu fuliyey ka mid ahaa Qaraxii Tiyaatarka iyo qaraxyo kale oo waaweyn.
Maxamed Ilka-case oo maxkamadda horteeda ka hadlay ayaa waxaa ka muuqatay inuusan kala jecleyn eedaha loo heysto, wuxuuna ku dooday in qofkii Shabaab gala uu yahay qof wax dila ee aan meeshaas loo tegin in Caano-boore lagu iibiyo, sida uu yiri wuxuuse caddeeyay inuu isagu maamule ahaa.
“Maamul ayaan ahaa aniga.. nin wax dilay ma ogi.. Qofkii Shabaab galay waxba kama dhowrsana. Caano- Booro meesha laguna gado ee dad ayuu dilaa.. Shabaab waa jabhad wax leysa qofkii galana wax buu dilaa…” ayuu yiri Maxamed Xaaji Ilkacase oo hadda xukun suge ah.
Kooxda uu maamulaha u ahaa ayaa lagu qabtay xaafadda Sey biyaano xilli ay doonayeen inay khaarijiyaan haweeney ka mida ergadii soo dooratay xildhibaannada Baarlamaanka Federaalka, kadibna waxaa lagu raadiyey ninkan horjoogaha ah.
Update: Maanta 31 Disambar ayaa Dil toogasho ah lagu xukumay 7 shabaab ah oo uu ka mid ayahay Maxamed Axmed Xaaji Ilkacase.
