Guddoomiyaha Gobolka Hiiraan Cali Jeyte Cismaan ayaa faahfaahin ka bixiyay sababaha keenay inuu hakaday dagaalkii Alshabaab ee ka socday Gobollada Dhexe iyo dhibaatooyinka soo wajahay dagaalladii socday.
Isagoo ka hadlayay xaaladda dagaalka Alshabaab ee Gobolka Hiiraan ayuu caddeeyay in Galbeedka Webiga oo ka harsan Gobolkiisa loogu dhaqaaqi waayey iyadoo aan la helin taageeradii ciidamadii dowladda, isla markaana beesha degaankaasi aysan diyaarsaneyn, suuragalna ay ahayn in beel kale la dul geeyo degaanada beel kale.
Mar la weydiiyay weerarrada ay Alshabaab ku qaadaan ciidamada dowladda iyo qasaaraha kasoo gaaraya ayuu sheegay in Ciidanka ay ka maqan tahay, xog, ciidamada xerooyinka ku jirana aysan ogeyn waxa ka socda iyo xogta 3 KM iyo iyadoo dadka degaanka aan la diyaarin.
“Meesha ay sarta ka quruntay waxay tahay in ciidamada Maleeshiyada loo diyaarin inay hormuud noqdaan oo dhulkooda difaacdaan, soona sheegaan xogta.. Shabaabkii ayaa dhinac kasta u dhex maraya degaanadii dadkuna waa fiirsanayaan..” ayuu yiri Cali Jeyte oo wareysi siiyay VOA.
Mar uu gudoomiyaha Gobolka Hiiraan ka hadlay qorshaha dagaalka Alshabaab iyo sida ay tahay in ooo wajaho ayuu yiri: “Dagaalkii aan galnay wuxuu ahaa ‘Kacdoon Bulsho’ oo dowladduana taageertay, waana lagu guuleystay, laakiin waxaad moodaa in degaanadii kale aan sidaas laga sameynin, sida kaliya ee lagu guuleystan karo waa kacdoon ddadweyne, mar haddii aragtidaas aysan shaqeynin aniga sidaas ayaan uga haray, wixii ka danbeeyana Soomaalida ayaa la weydiinayaa..”
Cali Jeyte wuxuu sheegay in Shacabka la diyaarin karo, dadkuna aysan reer reer uma kala fiicneyn, laakiin aanu garan karin sida wax yihiin.. “Sideedaba dadka Soomaalida difaac shaqo kuma laha umana sameysna, weerar ayuu leeyahay, ciidamadii weerar looma diyaarin, shacabkiina lama abaabulin..” ayuuna si cad u yiri.
