Maxkamadda Darajada koowaad ee Ciidamada Qalabka Sida ayaa xukun dil ah ku fulisay laba askari oo ka tirsan ciidamada milateiga oo ku eedeysnaa inay askar kale u geysteen dil bareer ah.
Maxamed Xaashi Waasuge Cosoble (Oday Daalay) ayaa lagu soo eedeeyay inuu dil bareer ah u geystay Marxuum Saciid Cusmaan Maxamed oo ay ka wada tirsanaayeen Ciidamada Amniga dilkaasi oo ka dhacay dugsiga tab-barka Jen. Shirbow 30-ka bishii Ogost ee sanadkan.
Sidoo kale C/risaaq Maxamed Jimcaale ayaa isna loo heystay dilka Qeys Khaliif Salaad oo ay ka wada tirsanaayeen Ciidamada Xooga Dalka, dilkaasi oo ka dhacay xerada Laanta-buure 27-ka bishii todobaad ee sanadkan.
Laba markaati, Warqadda dhimashada, sawrika marxuumka iyo qorigiis uu dilka ku geystay ayay ku soo bandhigeen xeer ilaalinta, waxa ayna markaatiyaasha oo ay kawada tirsanaayeen ciidanka xoogga dalka ee isku goobta ay yihiin cadeyn in si jees-jees ah uu u dilay Marxuumka halka dhanka qareenada ay ku doodeen in laga qaado diyo maadaama ay wada kaftamayeen marxuumka sidaasna ay sababtay dhimashadiisa.
Xafiiska Xeer Ilaalinta Ciidamada ayaa fadhiga Maxkamadda hor keenay Afar markaati oo dhammaantood isku raacay in Maxamed Xaashi Waasuge Cosoble Oday Daalay uu si bareer ah u dilay Marxuum Saciid Cusmaan Maxamed kadib markii uu isku dayay in uu carqaladeeyo shaqo amni uu haayay Marxuumka isla markaasna uu isku dayay in uu baxsado balse ay ciidamada oo ka tir badnaa ay hareereeyeen sidaasna qoriga uu dilka ku geystay looga qaaday.
Garsoorayaasha ayaa si wada jir ah ugu xukumay dil Maxamed Xaashi Waasuge Cosoble (Oday Daalay) & Cabdirisaaq Maxamed Jimcaale kadib markii ay ku qanceen cadeymaha labada kiis ee Maxkamadda la hor keenay.
Xukunsanayaasha ayaa heysta Fursad kale oo ay ku dalban karaan Rafcaan hadii aysan ku qancin xukunka Maxkamadda Darajada koowaad.
