Maxkamadda Gobolka Banaadir ayaa si rasmi ah maanta ugu yeertay 7 Mas’uul oo ka tirsan hay’adaha dowladda inay muddo 30 maalmood ah gudaheed ku hor yimaadaan Maxkamadda.
Mas’uuliyiintan oo ay ku jiraan agaasimeyaashii Hay’adda Socdaalka iyo Jinsiyadaha, agaasimihii Waaxda Canshuurta Berriga ee Wasaaradda Maaliyadda iyo xubno kale, ayaa lagu soo oogay Dacwad ciqaabeed kiis Musuq ah.
Xubnaha Maxkamaddu u yeertay, waxay kala yihiin:
Maxakamaddu ayadoo cuskanaysa Qodobka 128/D Xeer Lamabar 84 ee soo baxay Tr: 12/12/1972, waxay baafinaysaa kuna wargalinaysaa Eedeysaneyaasha kala ah:
1. Muxudiin Xasan Jurus, ahaana Agaasimaha Waaxda Canshuuraha Bariga ee Wasaaradda Maaliyadda Xukuumadda Faderaalka Soomaaliya, maqane.
2. Maxamed Idiriis Axmed,ahna Madaxa Qaybta Canshuuraha Dadban ee Wasaaraadda Maaliyadda Jamhuuriyadda Faderaalka Soomaaliya, maqane.
3. Dr. Maxamed Aadan Jimcaale (Koofi), ahaana Agaasimihii hore ee Hay’adda Socdaalka iyo Jinsiyadda ee Jamhuuriyadda Faderaalka Soomaaliya, maqane.
4. Cabduqaadir Cilmi Cali (Cabdul), ahaana Agaasimihii Hay’adda Socdaalka iyo Jinsiyadda Jamhuuriyadda Faderaalka Soomaaliya, maqane.
5. Dr. Cabdiraxmaan Maxamed Cali (Caadle), ahaana Agaasimihii hore ee Waaxda Ajaanibta ee Hay’adda Socdaalka iyo Jinsiyadda Jamhuuriyadda Faderaalka Soomaaliya, maqane.
6. Abuukar Xasan Aadan, ahaana Madaxii hore ee Xaqiijinta Dukumintiyada Codsiga Visa Kordhinta ee Waaxda Ajaanibta ee Hay’adda Socdaalka iyo Jinsiyadda Jamhuuriyadda Faderaalka Soomaaliya, maqane.
7. Cabdiwaaxid Muxsin Ibraahim, ahna Shaqaale katirsan Qaybta Ruqsadsiinta Ajaanibta ee Waaxda Sharciga iyo Xiriirka Shaqaalaha Wasaaradda Shaqada iyo Arrimaha Bulshada, kana howl gali jiray Garoonka Diyaaradaha Caalamiga ah ee Aadan Cabdulle Cismaan, maqane.
Xubnhaan dacwad ciqaab ah oo ay dhinac ka yihiin ayaa ka furany Maxkamadda Gobolka Banaadir, uuna kusoo eedeeyay Xafiiska Xeer-Ilaaliyaha Guud Ee Qaranka Qod: 241, 360, 366/71XCS iyo Qod: 4aad, 12aad, 46aad iyo 55aad ee sharciga Maaraynta Maaliyadda Guud, oo ah in ay galeen Musuq-Maasuq iyo Dayacaad Mas’uuliyadeed, been abuur dukuminti iyo ku Tak-rifal hanti dadwayne, kana dhacay Garoonka Diyaaradaha ee Magaalada Muqdisho.
“Maxkamaddu faraysaa eedeysaneyaasha sare ku xusan in ay ku hor yimaadaan Maxkamadda Muddo Soddon (30) maalmood gudahood ah, oo ka bilaabanaysa maalinta taariikhdu tahay Tr: 11/07/2023 kuna eg Tr: 10/08/2023, oo ah maalin Khamiis ah, saacaduna tahay: (10:00 Am) Subaxnimo, si ay is-kaga difaacaan eedda uu kusoo eedeeyay Xafiiska Xeer-Ilaaliyaha Guud Ee Qaranka”.”
Sidaas darteed, waxaa la idin farayaa in aad dhowrtaan wakhtiga Maxkamaddu idiin qabatay, haddii aad Maxkamadda ku hor imaan waydaan muddada sare ku xusan, Maxkamaddu waxay qaadi doontaa habraaca ku xusan Qod. 128/E Xeer lambar. 84, oo ah in ay qaadi doonto dacwadiina idinkoo maqane ah.
Saalax Cali Maxamuud
GUDDOOMIYAHA MAXKAMADDA G/BANAADIR
