Waxaa caawa saqdii dhexe kadib shir jaraa’id oo degdeg ah ku qabtay Muqdisho Midowga Musharixiinta oo si weyn uga hor yimid muddo kordhin ay doonayaan madaxda waqtigu ka dhacay.
“Waa nasiib darro gogoshii oo fidsan in muddo korosi la aado, waa nasiib darro aad u weyn oo soo wajahday dadka Soomaalyeed, waxay raadinayeen in la helo doorasho heshiis lagu yahay oo keenta xasilooni… Si cad ayaan uga soo horjeednaa, waana sharci darro, amaanadii umadda Soomaaliyeed cidna kuma takri fali karto, waxaan leenahay hogaanka dalka meesha uu ku socdo waa khaldan tahay” ayuu yiri Guddoomiyaha Midowga Mushariixinta Shariif Sheekh Axmed.
“Waxay muujineysaa xukun jaceyl iyo kursi isku dhejis, 2 bilood ayuu ku joogaa sharci darro, haddana wuxuu ka shaqeynayaa inuu muddo kororsi sharci darro ah sameeyo.. waxaa nasiib darro ah in lagu aadiyo maalinta ciidamada 12 April..” ayuu mar kale yiri Sheekh Shariif oo ciiidamada ugu baaqay inay aqbalin amarrada madax waqtigoodu dhacay.
Wuxuu sheegay in wax badan laga digay muddo kororsi, shalayna loo heystay lama filaan, laakiin maanta la dul joogo.. wuxuuna ka digay in dalka loo horseedo qalalaase xaaladda uga sii dara, tallaabo kastana ay noqon doonto sharci darro.
Shirka jraa’id ayaa waxaa Sheekh Shariif ku wehliyey Ra’iisal wasaarihii hore Xasan Cali Kheyre iyo C/raxmaan C/shakuur Warsame.
