Midowga Musharixiinta xilka Madaxweynaha ayaa ka hor yimid baaqa maanta kasoo baxay Beesha Calaamka ee ah in shir kale ay isugu yimaadaann Madaxda Dowlada Federaalka iyo Madaxweynayaasha maamul Gobleedyada oo dhowaan kusoo kala tegay shirkoodii Dhuusmareb 4.
Shir jaraa’id oo ay musharixiintu ku qabteen Muqdisho ayey uga hadleen xaalada dalka, iyadoo caddeeyay go’aankooda ah in Maxamed C/llaahi Farmaajo aanay u aqoonsaneyn madaxweyne, muddo xileedkiisii sharciga ahaan uu dhammaaday, isagoo aan dalka doorasho gaarsiin, heshiiskii Doorashana ku fashilmay inuu fuliyo.
Shirka jaraa’id waxaa ka hadlay Madaxweyniii hore Shariif Sheekh Axmed iyo musharax C/raxmaan C/shakuur Warsame, waxayna sheegeen inaan Farmaajo laga sugeynin inuu keeno heshiis Doorasho lagu aado ujeedkiisuna yahay inuu iska sii joogo.
C/raxmaan C/shakuur ayaa sheegay inuu Farmaajo mar kasta damaciisu ahaa inuu muddo kordhin helo, iyadoo saaka oo ugu danbeysay uu Baalramaanka geliyey 100 askari oo dharcad ah si xoog loogu marsiiyo muddo kordhin ay xukuumadu wadatay.
Wuxuu sheegay in Farmaajo uu Madaxtooyada ku fadhiyo ay tahay inqilaab dadban, mar haddii uu sharci daro ku joogo xilka, wuxuuna caddeeyay in tallaabooyinka ay qaadi doonaan ay maalmaha soo socda shaacin doonaan, iyadoo wixii ka yimaada haddii uu xilka dhigi waayo Farmaajo uu isagu qaadi doono.
C/raxmaan C/shakuur ayaa Beesha Caalamka u sheegay inaysan waqti ku lumin nin muddo kororsi raadinaya isagoo sharci darro ku fadhiya. “Haddii ay waayo aragnimo Farmaajo ugu dhiman yihiin waa dad habowsan beesha caalamka.. Waa caqabad u baahan in dalkan laga hor wareejiyo.. in Farmaajo nagula dul hayo waxay ka mid tahay xasilooni darrada iyo qaran dumiska dalkan lala damacsan yahay.. Beesha Caalamka waxaan ka rejayneynaa xubnahooda qaar inay ka waantoobaan inay Farmaajo dalka iyoi dadda kusii dul haayaan..” ayuu yiri C/raxmaan C/shakuur.
HOOS KA DAAWO
