Wararka laga helayo magaalada Muqdisho ayaa sheegaya in ciidamada Amniga ay toogasho ku dileen nin hubeysan oo dhaawacay askari ka tirsan ciidamada Booliska, kaasoo ku sugnaa Isgoyska Suuqa Bakaaraha ee magaalada Muqdisho.
Ciidamada Booliska ayaa sheegay in ciidamada ay toogteen ninka dableyda ahaa oo Bistoolad ku hubeysnaa, kaasoo dhaawac u geystay Askari ka tirsan Ciidamada dowladda oo ku sugnaa isgoyska Bakaaraha, waxaana ninka la dilay lagu tuhunsan yahay inuu ka tirsanaa Al-shabaab.
Nin kale oo ay wada socdeen ninka la dilay oo Mooto ku waday ayaa la sheegay inuu baxsaday, waxaana ciidamada ku soo baxeen markii ay dhacday rasaasta lagu dhaawacay askariga iyagoo iska hor imaad dhex maray ninka hubeysan iyo ciidamada Booliska, taasoo keentay in la dilo ninkii askariga dhaawacay.
