Musharaxa u taagan xilka madaxweynaha Jibriil Ibraahim Cabdulle ayaa shalay ku dhawaaqay musharaxnimadiisa isagoo taageerayaashiisa ay soo bandhigeen isu soo bixii ugu weynaa.
Kumanaan qof ayaa tegay hotelka City Palace ee Muqdisho iyadoo uu qaadi waayay hoolkii ay qabanqaabiyeyaasha ugu talogaleen ilaa 500 qof, waxaana dadku ay ku sugnaayeen barxadda hotelka iyo bannaankiisa.
Bandhiggan ayaa dad badan ku fasireen inuu ahaa wax ka badan taageerada musharaxa Jibriil, balse uu ku dhisnaa diidmada Xasan Sheekh Maxamuud oo intii uu talada hayay sameystay caddow fara badan, waxaana xusid mudan in labada nin ay isku jufo yihiin.
Bandhigga dadka ka sokow musharax Jibriil wuxuu jeediyay khudbad uu ku sheegay inuu kaliya ku shaacinayay musharaxnimadiisa, balse qorshihiisa madaxweyne uu dib ka faafin doono, isla markaana tegi doono gobollada dalka.
Hadalkii dheeraa ee uu Jibriil Ibraahim Cabdulle ka jeediyay xafladii shaacinta musharaxnimadiisa wuxuu u badnaa weerar afka ah oo uu ku qaadayo madaxweynihii isaga ka horeeyay, wuxuuna afartii sano ee uu xilka hayay Xasan Sheekh ku tilmaamay 4 sano oo qasaartay.
Intaas oo kaliya maahee musharax Jibriil wuxuu si cad uga hadlay dhac loo geystay hantida qaranka, tacadiyo iyo takrifal awoodeed, wuxuuna adeegsaday wax waliba oo uu waxba kama jiraan uga dhigayo dowladda hadda jirta ee xilkeedu sii dhammaanayo.
Ma jirto waxqabad uu balanqaaday iyo qorshe uu dadka u sheegay iyadoo musharixiin badan ay hore u shaaciyeen qaabka ay doonayaan inay dalka ku hogaamiyaan, waxayna xafladaasiu ahayd meesha laga filayay ee ugu haboon inuu qorshihiisa ku shaaciyo.
Dad badan ayaa aaminsan in musharax Jibriil kaliya u sharxan yahay sheegista khaladaadka Xasan Sheekh galay, balse aanu heyn wax qorshe ah oo lagu saxo marka laga reebo inuu isbedel loo baahan yahay oo dadku wax badan samreen.
Musharax Jibriil wuxuu Xasan Sheekh kala mid yahay:
- Inay hal jufo kasoo wada jeedaan.
- Inay ururada Bulshada ka wada yimaadeen (Xasan Sheekh & Jibriil waxay ka wada shaqeyn jireen Hay’adda CRD ee uu hadda madaxda ka yahay Jibriil)
- Inay labaduba qaadan talo oo ay isu heystaan inay dadka ugu caqli badan yihiin.
Qiimeynta hordhaca ah ee musharax Jibriil Ibraahim Cabdulle waxay sheegeysaa inuusan wax badan dhaami doonin Maxamed C/llaahi Farmaajo, maadaama codka lagu gaarayo kursiga Villa Somalia doonayo aysan ahayn mid ku xiran dhalinyarada.
Waxaa kaloo jira shaki badan oo ka dhashay xafladii shaacinta musharaxnimada Jibriil Ibraahim Cabdulle markii la arkay nin uu adeer u yahay Musharaxa C/raxmaan Faroole barbar taagan Jibriil isla markaana ka mida xubnaha ugu horeeya ololihiisa, waxaa durba la isku xirayaa labada musharax ee C/raxmaan Faroole iyo Jibriil Ibraahim Cabdulle, taaso mar kale dhulka la geli karta shacbiyadda ku dhisan Xasan naceybka ee uu hadda heysto Musharaxan.
Faallooyinka Doorashada
