Musharixiinta xilka madaxweynaha Soomaaliya ayaa isku garbinaya magaalada Baydhaba ee xarunta maamulka Koonfur Galbeed oo ah magaalada ugu badan ee lagu soo xuli doono xildhibaanada labada aqal doorashooyinka 2016.
Musharaxa Jibriil Ibraahim Cabdulle ayaa hore u tegay magaaladaasi oo si weyn loogu soo dhoweeyay, waxaana kulamo kala duwan la yeeshay waxgaradka iyo odayaasha Digil iyo Mirifle.
Ololaha Musharax Jibriil ayaa ololihiisa doorashada ka bilaabay magaalada Baydhaba, sidii uu hore u balanqaaday, laakiin waxaa maalmo kadib uga daba tegay Musharaxa kale ee Xasan Sheekh Maxamuud oo isna wacdarro ka dhigay Baydhaba, waxaana uu Xasan Sheekh dheeraa Jibriil inuu weli huwan yahay xilka madaxweyne oo si rasmi ah loo soo dhoweeyay.
Xogta aanu heleyno ayaa ah in musharaxa kale ee Shariif Sheekh Axmed uu iska ku sii jeedo magaalada Baydhaba, isagoo ka war sugaya inta uu ka soo laabanayo Xasan Sheekh.
Shariif Sheekh Axmed oo saaxiibtinimo gaara ay kala dhaxeyso Shariif Xasan Sheekh Aadan oo ka taliya Maamulka Koonfur Galbeed ayaa isna doonaya inuu ololihiisa ka dhaqaajiyo Baydhaba.
Shariif Xasan ayaa ciyaaraya doorashada qorshe laba afle ah oo cid waliba uu heshiis kula galayo si ay isaga baheystaan doorashada soo socota, waxaana ujeedkiisa ugu weyn uu yahay inuu ka takhaluso Prof. Maxamed Cusmaan Jawaari oo mar kale u sharxan guddoomiyaha baarlamaanka.
Wadani.com
