Waxaa saaka magaalada Muqdisho ka bilaabatay diiwaangelinta musharixiinta u taagan xilka Guddoomiyaha Baarlamaanka Soomaaliya iyadoo ay soo baxeen musharixiin cusub oo xilkaasi u taagan.
Guddiga Qabanqaabada doorashada ayaa goor dhoweyd bilaabay diiwaangelinta musharixiinta u taagan xilka guddoomiyaha golaha shacabka, iyadoo laga doonayo shuruudo ay ka mid yihiin inuu shubo lacag dhan 10,000 Doolar iyo inuu xildhibaankii wasiir ah iska casilo xilka.
Musharax cusub oo mug leh ayaa la sheegay inuu ku soo biiray xildhibaannada isu soo sharaxay xilkan, kaasoo ah Cali Xaaji Maxamed Nuur, waxayna wararku sheegayaan inuu taageero ka heyso xildhibaanno badan.
Xildhibaannada wasiirada ah ee u sharxan xilkan ayaa caqabad soo wajahday markii guddiga shardi uga dhigay inay xilalka wasiirnimo iska casilaan, waxaana socda waanwaan arrintani ku saabsan.
