Musharixiinta u taagan xilka madaxweynaha maamulka Jubbaland oo gaaraya 8 musharax ayaa kulan ay KU yeesheen magaalada Muqdisho kasoo saaray go’aan ku aadan Doorashada Jubbaland oo qabanqaabadeeda ka socoto magaalada Kismaayo.
Musharax C/rashiid Maxamed Xiddig oo kulankaasi kadib ku hadlay magaca musharixiinta ayaa sheegay in waxa ka socda magaalada Kismaayo aysan doorasho ahayn, balse wax waliba u afduuban yihiin Axmed Madoobe oo xilkiisu dhammaaday, isagoo intaasi ku daray in doorashada Jubbalad ka socota ay tahay mid u afduuban ninka xilkiisu dhammaaday ee madaxweynaha sii haya maamulkaasi.
Wuxuu intaasi ku daray nidaamkii xulitaanka, Odayaashii Beelaha iyo shuruucdii oo dhan inay u afduuban yihiin Axmed Madoobe, si shaqsi ahna qof ugu adeeganayo. taasoo ah waqti lumis iyo wax burburin, ayna doonayaan in dariiqii saxda lahaa lagu soo celiyo doorashada oo odayaasha ay soo xulaan hal xildhibaan.
“Baarlamaanka Jubbaland liiskiisa waa qoran yahay, waxaana lasoo saari doonaa maalmaha soo socda, ma aha wax la aqbali karo.. waxaan u soo jeedineynaa beesha caalamka iyo dowladda federaalka inay kaalintooda qaataan oo korjoogto ka noqdaan, wixii khaldana ay qabtaan..” ayuu yiri Musharax C/rashiid Xiddig.
Waxay ka digeen haddii sida wax u socdaan waxba laga qaban waayo oo doorasho xalaal ah ka dhici weydo magaalada Kismaayo ay Musharixiinta iyo Odayaasha oo la socda ay Doorasho ku qabsan doonaan meeshii ay doonaan, ayna dooran doonaan madaxweyne.
Musharixiinta ayaa caddeeyay in Guddiga Doorashada ay lumiyeen, qaarkoodna ay ka tallaabeen shaqadooda, ujeedkuna yahay in doorashada madaxweynaha Jubbaland lagu shubto.
HOOS KA DAAWO
