Madaxweynaha Somaliland Muuse Biixi Cabdi ayaa ka hadlay kulankii magaalada Addis ababa ku dhex maray Madaxweynaha Soomaaliya Maxamed C/llaahi Farmaajo, kasoo uu soo qabanqaabiyey Ra’iisal wasaaraha Itoobiya Abiy Ahmed.
Isagoo khudbadii sanadka jeedinayey ayuu sheegay inuu 9-kii bishan Febraayo uu tegay magaalada Addis ababa si uu olole ugu sameeyo qadiyadda Somaliland, markii shirkii dhammaadayna ay qorsheysteen inay baxaan 10-ka bisha, balse xafiiska Ra’iisal wasaaraha Itoobiya uu la soo xiriiray loona sheegay in lagu marti qaaday kulanka dhacaya xafiiska Ra’iisal wasaaraha 11-ka bishan.
“Aad ayaan ugu farxay kulankaasi la iigu yeeray.. orod baan ku tegay xafiiska Ra’iisal wasaaraha Itoobiya, salaan iyo wadahadal kadib wuxuu Abiy Ahmed ii sheegay inuu imaanayo Farmaajo, isla markiibana waa yimid,.. Saddexdeena ayaan shirkii ku galnay, anigoo aan diyaar u ahayn. Abiy wuxuu yiri: waxaan doonayaa inaan dhex galo dhibaatada Somalia iyo Somaliland, Anigu waan aqbalay, Farmaajana wuu aqbalay… intaas wax ka badan lagama hadlin,waqtina looma heyn..” ayuu yiri Muuse Biixi.
Wuxuu intaas ku daray inuu soo dhoweynayo raali gelintii iyo cudurdaarkii uu bixiyey Madaxweyne Farmaajo 13-kii Febraayo, taasoo uu ku tilmaamay inay tahay bilow fiican oo arrinta laga geli karo, sida uu yiri, inkastoo uu ku jiray erey aan wanaagsaneyn.
Dalalka Sweden iyo Turkey ayuu sheegay inay ku jireen dadaal lagu wadahadalsiinayo Somalia iyo Somaliland, iyadoo Jabuuti lagu casuumay inay kusoo biirto.
Raaligelinta Farmaajo bixiyey ayuu sheegay Madaxweynaha Somaliland inay xumeyneyso warka ku saabsan inuu Farmaajo imaanayo magaalada Hargeysa, wuxuuna ku tilaamay inaysan is qaban raaligelinta iyo imaanshihiisa.
Muuse Biixi ayaa si weyn uga biyo diiday tegista Madaxweyne Farmaajo ee magaalada Hargeysa, iasgoo sheegay inay taasi dhici doonin, wuxuuna so qaatay ereyo ka mid ahaa gabaygii Faarax Nuur ee ahaa: “Doqon baa halkii lagu qatali qoorta soo dhigane ma anaa mindiyo lay qarshaa laygu qali doono..”
