Madaxweynaha Somaliland Muuse Biixi Cabdi ayaa sheegay inaysan marna aqbaleynin in qabiil lagu bedelo Xadkii Somaliland, isla markaana aanay dhici doonin in xuduudka Somaliland xoog lagu bedelo.
Muuse Biixi oo khudbad u jeediyey labada Gole ee Somaliland ayaa Puntland ku eedeeyay inay dagaalka Laascaaanood ay ka danbeyso iyadoo qabiil adeegsanaysa, isla markaana dooneysa dhul ay Somaliland leedahay.
“Maamulka Puntland wuxuu is dhacsiiyay Villa Somalia haddii aanu madaxweyne ama Ra’iisal wasaare ka noqon inaanay aqbalin in Villa Somalia inay cid kale maamusho.. Waxay Puntland ku taameysay inay hesho qeyb ka mida Somaliland oo ay uga cad goosato Villa Somalia..” ayuu yiri Muuse Biixi oo Puntland inay hurisay dagaalka Laascaanood, si cadna u qiratay.
Madaxweynaha Muuse Biixi ayaa khudbadiisa ku sheegay inay Laascaanood dadkeeda Haldoorka ah ku leysay Argagixisada, iskana dhigtay inay Somaliland dadka leyneyso, balse dadka Sool loo akhriyey inay dadkooda leysay Somaliland, laguna kiciyay dadkii.
Wuxuu qiray inay is maamulayeen dadka Reer Sool, marka laga reebo Barasaabkii oo dhinacooda ahaa, isagoo ku dooday in 15 sano uu ciidanka Somaliland joogay Laascaanood aanu ku kicin hal dembi, kana xun yihiin waxa hadda ka socda Laascaanood.
Muuse Biixi Wuxuu ku baaqay wadahadal, isagoo sheegay inay ciidankiisiina ka baxeen oo xeryahooda ku laabteen, cidda ka hor joogta nabadda ay tahay Garaadadda dagaalka ku baaqay.
“Midna ma suuroobeyso.. Xadkii Somaliland ayaan xoog qabili ah ku bedelayaa, caalamkana kama dhacdo.. haddii la is diido, waa la wadahadlaa…” Ayuu yiri Madaxweynaha Somaliland Muuse Biixi.
