Taliyaha Ciidamada Dhulka ee Xoogga dalka Soomaaliyeed General Maxamed Tahliil Biixi ayaa maanta gaaray magaalada Beledweyne.
Taliyaha oo ay la socdaan Taliyaha Qeybta 12-ka April Jeneraal Tawane Axmed Gurey iyo saraakiil kale, waxaana Garoonka diyaaradaha magaalada Beledweyne kusoo dhoweeyay Taliyaha Qeybta 27-aad Ciidanka Xooga Jeneral, Guddoomiyaha Gobolka Hiiraan Cali Jeyte Cusmaan iyo saraakiil kale.
Ujeedka socdaalka Taliyaha Ciidamada Dhulka ee magaalada Beledweyne ayaa sheegaya inay la xiriirto xaaladda magaalada iyo sidii xal loogu heli lahaa khilaafka u dhaxeeya ciidamada dowladda iyo kuwa kacdoonka Gobolka Hiiraan oo dhowr jeer isku dhacay.
Wararka qaar ayaa sheegaya inuu wakiil ka yahay Farmaajo iyo Fahad Yaasiin si uu heshiis ula galo Jeneraalka hoggaaminaya kooxaha kacdoonka ka wada Magaalada Beledweyne, halkaas oo uu yaallo Kursi ka tiran Golaha Shacabka, kaasoo uu doonayo inuu kusoo baxo agaasimihii hore ee NISA Fahad Yaasiin Xaaji Daahir.
Jeneraal Abuukar Xuud oo hoggaamiya Jabhadda Hiiraan ayaa saaka lagu arkay garoonka Beledweyne isagoo soo dhoweynaya Taliyaha Ciidamada Dhulka, arrintaas oo shaki badan dhalisay.
Kooxaha kacdoonka ka wada magaalada Beledweyne ayaa si weyn uga horjeeda madaxweynaha Hirshabeelle Cali Guudlaawe iyo Madaxweynaha muddo xileedkiisu dhammaaday ee Maxamed C/llaahi Farmaajo.
