Nin ayaa middi ku weeraray dad saarnaa bas, magaalada ku taalla waqooyiga Jarmalka ee Luebeck, isagoo dhaawacay 14 qof oo 2 ka mid ah ay aad u liitaan,ka hor intii aysan boolisku xirin.
Booliska Schelswig-Holstein ayaa sheegay in cidna aan lagu dilin shilkaas,waxayna xaqiijiyeen in ninkaas ay gacanta ku hayaan markii ay ka awood badiyeen ciidamada oo la xiray iyadoo baaritaan uu ku socdo.
“Qofka falka gaystay waxaa ka awood badiyey oo xiray booliska. Weli waxaan ku sugannahay goobta, halkaa ayaanan xaaladda ka soo tabinaynaa” ayuu boolisku ku qoray Twitter.
Wargayska Leubercker Nachrichten ayaa soo xigtay haweeneyda dacwad oogaha dawladda, Ulla Hingst, oo leh “ma jiraan wax la dhayalsan karo, xataa in ay arrintan argagixiso salka ku hayso”.
Ninka weerarka qaaday ayaa da’diisu lagu sheegay ’30 meeyo jir kasoo jeeda dalka Iiraan, iyadoo aan meesha laga saarin falku inuu ahaa mid argagixiso; waxayna soo xigteen qof goobjooge ah oo leh “mid ka mid ah dadka dhaawacu soo gaaray ayaa qof waayeel ah kursi uga kacay markii uu ninka weerarka qaaday xabadka middi kaga dhuftay”.
Bishii April ayaa nin gaari waday wuxuu kula dhex dhacay koox dad ah oo fadhiyey makhaayad dibadeeda, magaalada Jarmalka ku taalla ee Muester, halkaasoo uu laba qof ku dilay, ka hor intii uusan toogasho isku dillin.
