Wararka laga helayo degmada Caabudwaaq ee Gobolka Galgaduud ayaa sheegaya in dad dhowr ah lagu laayay kadib markii ay rasaas ku fureen koox dabley ah.
Koox hubeysan ayaa galabta caawa weerar ka geysatay Guri ay shir ku lahaayeen beel ka mida kuwa dega degmada Caabudwaaq, waxayna halkaasi ku dileen laba Nabad-doon iyadoo dhaawacay 9 qof oo 5 ka mida ay rag yihiin 4 kalena haween.
Labada nabadoon ee la dilay ayaa lagu kala magacaabaa Fanax Jaamac Ddooley iyo Maxamed Barre Diini, waxaana dadka dhaawacmay ku jira laba oday. Dilkan ayaa loo maleynayaa inuu salka ku hayo aano qabiil oo ka dhalatay sarkaal lagu dilay saldhiga booliska Caabudwaaq.
Dableyda falka geysatay ayaa gaareysan 10 nin oo watay gaari NOAH ah ayaa goobta ka baxsatay, waxaana xaaladda magaalada ay caawa isu bedeshay mid kacsan kadib dhacdadaasi.
Degmada Caabudwaaq ayaa caawa ku jira xaalad bandow ah iyadoo aanu jirin wax isu socod ah, waxaana ka jira xaalad qasan iyadoo ay dadaal wadaan odayaasha degmadaasi si xiisad jirta loo qabooijyo.
Wadani.com
