Maxamed C/llaahi Farmaajo oo ah madaxweynaha muddo xileedkiisu dhammaaday ee xilka banneynaya ayaa markii ugu horeysay Baraha bulshada ka bilaabay ololihiisa Doorashada, xilli shaki laga qabay inuu mar kale xilka u tartamayo.
Farriintii uu horeysay ee ololaha doorashada Farmaajo ayaa cinwaan kooga dhigay “Isbedel doonka socda” taasoo la yaab ku nqootay dad badan, iyadoo shan sano kadib uu Musharax Farmaajo doonayo inuu ku ololeeyo ‘ISBEDEL’.
Dad isugu jira siyaasiyiin, Aqoonyahan iyo shacab ayaa ka falceliyey ololaha doorashada Farmaajo iyo sida uu ku bilowday, waxayna qaarkood Duqa ku tilmaameen Nin riyo ku jira, halka qaar kale ay eedeeyeen kooxda ololaha Farmaajo.
Xildhibaan Mahad Maxamed Salaad ayaa falcelintiisa ku yiri: “Shan (5) sano kadib hadiiba Farmaajo uu maanta leeyahay ‘ISBEDDEL DOON AYAAN AHAY’, wallee waxaan hubaa GABOW MOOYEE IN UUSAN GARAAD U KORDHIN shantii sano ee uu Villa Soomaaliya joogay! Markaan oo kale waxa igu soo dhacda maansadii Abwaan Gaariye AUN ee ahayd: “Hadaan Guga kuu kordhaa gabow mooyee ku tarin garaad iyo waayo arag ilayn wax ma dhaantid geed”.
Jaamac Dabaraani -afhayeenka Musharax Siciid Deni ayaa qoraalkan kooban ku fal celiyay: “Awooda Isbedel doonku waxay gaartay heer kii la bedeli lahaa, isna uu qirto oo u baahdo in la bedelo!“
Xildhibaan hore Axmed Macalin Fiqi ayaa isna qoraalkan ku jawaabay: “Kalimaddda isbededoonka socda sow lama micno ahan kii isebdelka rabay ee awooddu ay ku yaraatay dabadeedna huleeley! Waa ninkeed sheega ma dhaafto ama sida waayadan danbe socotay in odagu uu quustay oo uu doonayo isbedeldoonka socda in uu wax ku callaasho. Talo ma seegin! Labada dhinacba kii loo qaado duqii waa ku daayay ayaa soo baxayso kalase roon.!.Waxaa kale oo dhici karta odayga in laga adeegtay oo niman raba in ay daba goostaan ay soo curiyeen hal-hays aan xaaladda iyo waqtiga la joogo midna ka turjumayn, waana kuwii wadada ka lumiyey shantii sano ee la soo dhaafay! Hal-hayska Farmaajo waa isbedelka haloo hiiliyo!”
