Maamul Goboleedka Puntland ayaa amar kasoo saartay tallaabo laga qaadayo masaajidda aan u hoggaansamin amarkii lagu xiray ee lagu joojiyay salaadaha jimcaha iyo Jameecaadda si looga hortago faafista cudurka COVID-19.
Wasiir Ku xigeenka Wasaaradda Amniga Puntland Cabdulaahi Cabdisallaan Xasan oo shir Jaraa’id xalay ku qabtay Garoowe ayaa sheegay in Amarkii madaxweynaha Puntland ee lagu xiray Masaajidda si dadka looga badbaadiyo cudurka Covid-19 la dhaqan gelinayo, iyadoo ciddii jebisa tallaabo laga qaadi doono.
Ciidamada dowladda ayaa lagu amray inay dhaqan-geliyaan amarkii lagu joojiyay salaadaha jimcaha iyo jameecaadka, si looga feejignaado faafidda cudurka Coronavirus, waxaana sidoo kale la xoojinayaa xayiraadda Qaadka Puntland kasoo gala Itoobiya.
Arrintan ayaa timid, iyadoo Culimada degaanada Puntland u hoggaansami waayey amarka lagu xirayo masaajidda oo ay si caadi ah u furan yihiin, taasoo keentay in amar kale la soo saaro.
