Wakiilada beesha caalamka ee Soomaaliya ayaa War-saxaafadeedyo xambaarsan canbaareyn iyo tacsi kasoo saaray qaraxyada iyo weerarradii ka dhacay magaalooyinka Muqdisho iyo Beledweyne.
Waxay si weyn uga hadleen Qaraxii is-miidaaminta ahaa ee xalay magaalada Beledweyne lagu dilay xildhibaan Aamina Maxamed Cabdi oo qaarkood ku tilmaameen mid siyaasadeed.
Wakiilka Midowga Yurub ee Soomaaliya Tina Intelmann ayaa farriintii ugu cusleyd ku tiri: “Rabshado hore uguma socon karto Soomaaliya. Midowga Yurub wuxuu cambaaraynayaa falalka argagixisada iyo dilalka ku salaysan siyaasadda. Tacsi ayaan u diraa Qoyska Xildhibaan Aamina Maxamed Cabdi”
Farriin ka timid Xafiiska Qaramada Midoobay ee Soomaaliya ayaa lagu dalbaday in baaritaan lagu sameeyo falka lagu dilay xildhibaan Aamina, si nabad ahna lagu soo dhammeeyo Doorashada dalka.
“Bahda Qaramada Midoobay ee Soomaaliya waxa ay cambaareyneysaa weerarkii ismiidaaminta ahaa ee lagu dilay xildhibaan Aamina Maxamed iyo dadkii kale ee xalay ka dhacay magaalada Beled Weyne. Waxa ay ka tacsiyeynaysaa dilkaas, waxa ayna Qaramada Midoobay soo dhowaynaysaa in baaritaan lagu sameeyo falkaas foosha xun, iyadoo ku baaqeysa in hannaanka doorashada dalka lagu soo gabagabeeyo si nabad ah oo ammaan ah” ayaa lagu yiri qoraalka Q/Midoobay.
Safiirka UK ee magaalada Muqdisho Kate Foster ayaa dhinaceeda farriin kasoo saartay qaraxyada Beledweyne iyo Muqdisho, iyadoo ku tilmaantay kuwo la doonayo in lagu carqaladeynayo Doorashada.
“Niyadeenna waxay la jirtaa dhammaan dadkii ay saameeyeen weeraradii ka dhacay Muqdisho iyo Beledweyne shalay. Waxaanu si adag u cambaaraynaynaa falalka foosha xun ee lagu carqaladaynayo doorashooyinka. UK waxay garab taagan tahay Soomaaliya dagaalka lagula jirto argagixisada”.
