Wararkii ugu danbeeyay ee magaalada Dhuusamareeb ayaa sheegaya in xaalada ay hadda degan tahay kadib dagaal saacado badan qaatay oo maanta ka socday agagaarka xarunta INJI ee fadhiga madaxda Ahlu suna.
Inta badan ciidamada Ahlu suna ee ka dagaalamayey xarunta INJI ayaa la sheegay inay isu dhiibeen ciidamada dowladda Soomaaliya ee ku hareereysan xaruntaasi, waxaana hadda socda waanwaan ku saabsan sida madaxda Ahlu suna halkaasi looga saari lahaa xarunta.
Madaxda Ahlu suna iyo ilaaladooda ayaa ku sugan xarunt INJI iyagoo ku adkeystay inay keliga isu dhiibayaan ciidamada AMISOM oo aysan ogoleyn inay ciidamada dowladda Soomaaliya la macaamilaan.
Ciidamo cusub oo laga qaaday magaalada Muqdisho ayaa maanta gelinkii danbe ku biiray dagaalka, iyagoo waxyeelo badan la gaarsiiyey xarunta INJ ee fadhiga madaxda Ahlu suna, taasoo keenay in xaaladda ay dhinac u liicdo.
Afhayeenka Galmudug Cismaan Ciise Nuur (Taardhuleed) ayaa sheegay in Ahlu suna ay dagaal iyo qas ka bilowday magaalada Dhuusamareeb, iyagoo dhinac waliba u riday rasaas iyo madaafiic, wuxuuna caddeeyay in lasoo afjaray qalalaase ay ka sameeyeen Dhuusamareeb iyo Guriceel.
Qorshe ay wateen madada Ahlu suna oo ahaa in ciidamada AMISOM ay isu dhiibaan, kadib markii xiriir dhex maray ayaa waxaa diiday ciidamada dowladda Soomaaliya, waxayna ciidamada AMISOM dib ugu noqdeen fadhigooda Garoonka Diyaaradaha magaalada Dhuusamareeb, inkastoo ay weli socdaan wadahadallo ku saabsan madaxda Ahlu suna.
Waxaa weli socda xiriiro ku saabsan sidii madaxda Ahlu suna arrintooda xal loogu heli lahaa, iyadoo Wararkii ugu danbeeyay ee magaalada Dhuusamareeb ayaa sheegaya in ciidamada Ahlu suna ee difaacayey xarunta INJI intooda badan la geeyay guriga uu degan yahay madaxweyne ku xigeenka Galmudug.
HALKAN KA AKRISO WARARKII UGU DANBEEYAY EE DHUUSAMAREEB & MADAXDII AHLU SUNA OO ISU DHIIBAY CIIDAMADA DOWLADDA:
