Waxaa Magaalada Muqdisho lagu soo bandhigay saddex nin oo la sheegay inay ahaayeen dableyda kooxda Alshabaab u qaabilsan khaarijinta dadka ee ka howlgeli jiray degmooyinka Wadajir iyo Dharkeynley ee Caasimadda.
Raggan ayaa saxaafadda loogu soo bandhigay Saldhiga Booliska Degmada Wadajir iyagoo qiranaya inay ka tirsan yihiin Al-shabaab, isla markaana ay u qaabilsanaayeen dilalka qorsheysan ee laga fuliyo degmooyinkaasi, waxayna dalbadeen in la cafiyo kadib markii ay soo qabteen ciidamada Booliska.
Waxaa la sheegay in raggan lasoo qabtay xilli ay doonayeen inay toogtaan haweeyney la sheegay inay ka mid ahayd ergadii soo dooratay Xildhibaanada Golaha Shacabka oo Qaadka ku iibisa beerta Jaadka, kadib markii ay u dhici weysay Bistooladii lagu khaarijin lahaa.
Ragga la soo bandhigay ayaa magacyadooda lagu kala sheegay: Shuceyb Cabdullahi Xaaji, Ismaaciil Maxamed Aweys iyo Maxamed Cismaan Macallin Axmed, waxayna dalbadeen in la cafiyo.
Hooyada ka badbaaday dilka ayaa sheegtay inay 7-caruur ah biil u raadiso, ninkeeduna yahay Boolis, waxayna dowladu ka dalbatay inay badbaadiso oo damaanad qaado noloshooda.
Tallaabadan ay qaadeen Booliska iyo Maamulka Gobolka Banaadir oo ay saxaafadda ugu soo bandhigeen rag sheeganaya inay Alshabab ayaa noqonaya kiiskii ugu horeeyay muddooyinkan, waxaana la yaab lahaydi in haweeney shacab ah oo dil ka badbaaday iyana saxaafadda la hadasho.
