Doorashada Madaxweynaha Mareykanka ayaa maanta looga dareeray dalkaasi iyadoo ay si weyn ugu loolamayaan Madaxweynaha xilka haya Donald Trump iyo madaxweyne ku xigeenkiii hore ee dalkaasi Joe Biden.
Xaaladda Amniga ayaa si weyn loo adkeeyay iyadoo laga cabsi qabo inay rabshado ka dhacaan dalkaasi marka ay soo baxaan natiijooyinka ugu horeeya, kadib markii Madaxweyne Trump uu shaaciyey inuu iskiis ugu dhawaaqi doono inuu ku guuleystay Doorashada haddii ay soo baxaan inuu ku horeeyo Gobollada lagu tartamayo.
Trump ayaa sidoo kale hore u sheegay inuusan aqbali doonin natiikada Doorashada oo marar badan uu sheegay inay ku shubayaan Xisbiga Dimoqraadiga ee ninka la tarramaya uu kasoo jeedo, wuxuuna diidan yahay codadka lagu dhiibto Boosatada.
Taageerayaasha Caddaanka Midigta fog ee hubeysan ayaa laga cabsi qabaa inay rabshado sameeyaan ama u dabaal degaan guul Doorasho oo aan jirin, kadibna ay iska hor yimaadaan taageerayaasha xisbiga Dimoqraadiga.
Donald Trump oo ka cabsi qaba in doorashadan looga adkaado ayaa ku doodaya in Doorashada la xadi doono ama lagu shuban doono, wuxuuna diidan yahay in tirinta codadka ay dib u dhaceen, taasoo ka imaaneysa Gobollada qaar oo ogol in codadka Boostada lagu dhiibtay la tiriyo kadib maalinta doorashada ilaa 3 maalmood kadib.
Arrimahan oo dhan waxay muujiyeen in Doorashada Mareykanka ee sanadkan 2020 ay wadato halis laga qabo qalalaase iyo nabadgelyo darro ka dhacda, xilli Madaxweynaha Kursiga ku fadhiya uu muujiyey inuusan dooneyn inuu xilka ku wareejiyo si nabad ah.
