Golaha Xaquuqul Insaanka ee dalka Qatar ayaa shaaciyey tirada dadka reer Qatar ee laga horjoogsaday inay sanadkan soo gutaan waajibaadka Xajka, iyagoo isu diiwaan geliyay.
Warbixin uu kasoo baxday Golahan ayaa lagu sheegay in 2400 oo dadka reer Qatar ah Sacuudigu ka hor istaagay xajka sanadka, iyadoo Sacuudiga uusan kasoo jawaabin codsiga rasmiga ah oo ay Xujeydaasi ku doonayaan in lagu siiyo waraaqahooda si u galaan Sacuudiga.
Dowlada Sacuudiga ayaa horey u sheegtay in xiisada siyaasadeed ee u dhaxeysa labada dal aysan wax saameyn ah ku yeelin doonin dadka Xujayda ah iyo muwaadiniinta reer Qatar ee doonaya inay booqdaan dalka Sacuudiga iyo magaalooyinka barakeysan.
Wakaalada Wararka dalka Qatar ayaa soo xigatay Golaha Xuquuqda Insaanka dalkaasi oo tallaabadan ku tilmaantay xadgudub cad oo lagu sameeyay xuquuqda muwaadiniinta dalka Qatar ay u lahaayeen inay sanadkan gutaan waajibaadka xajka.
Dowladda Qatar ayaa iska diiday dalab ka yimid Boqorka Sacuudiga oo ahaa in diyaaradaha dalkaasi ay daadgureeyan xujeyda Dalka Qatar, isaguna uu kharashka ka bixiyo, iyadoo Sacuudiga aanu dooneyn inuu xiriir la sameeyo dowladda Qatar ayaa arrintaasi noqotay mid aan xaqiiqo ahayn oo warbaahinta loogu talogalay.
Markii ugu horeysay muslimiinta ku nool dalka Qatar ayay taariikhda u suurageli weyday inay xajiyaan arrimo siyaasadeed oo ay isku hayaan Sacuudiga iyo Qatar dartood, taasoo sii xoojineysa eedaha loo jeedinayo Sacuudiga inuu xajka u adeegso siyaasad ahaan.
