Iyadoo shirkii Madaxda Dowladda Soomaaliya iyo kuwa Maamul Gobaleedyada uu weli ka socdo magaalada Muqdisho ayaa waxaa soo baxaya faahfaahin ku saabsan arrimo la isku hayo oo dib u dhigay in lasoo xiro shirka.
Xogta laga helayo Madaxtooyada ayaa sheegeysa in xilli la bilaabay qoritaanka war-murtiyeedka shirka lana maalmood ka hor ay cabasho ka timid qaar ka mida madaxda maamul goboleedyada oo la yimid qodobo cusub, taasoo keentay in shirku dib u dhac aan waqti lahayn galo.
Arrinta ugu weyn ee sababtay dib u dhaca shirka ayaa noqotay dacwad ka timid madaxweynaha maamulka K/Galbeed Shariif Xasan Sheekh Aadan oo dowladda ku eedeeyay inay olole xilka looga qaadayo ka wado magaalada Baydhaba ayna halkaasi tageen xubno xukuumadda ka mida oo lacag geeyay.
Shariif Xasan ayaa dalbaday in arrintan oo jirta aanay suuragal ahayn inuu shirka kasii mid ahaado, dowladdana heshiis la galo iyadoo olole ka dhan Baydhaba ka wada, waxaase arrintaasi beeniyay Ra’iisal wasaare Xasan Cali Kheyre oo sheegay in xukuumadda aanay wax shaqo ah ku lahayn shaqsiyaadka iyo siyaasiyiinta lagu eedeynayo inay xukuumaddu wadato oo maamullada qaarkood ololaha siyaasadeed ka wada.
Arrimhii kale sida dhaqaalaha, Amniga iyo dib u eegista Dastuurka ayaa laga heshiiyay, waxaana guddiyo xiriirin ah loo saaray arinta dagaalka lagu qaadayo Alshabaab.
Mid ka mida madaxda maamul Goboleedyada ayaa laga soo xigta in shirku hadda bilow yahay oo Sabtida uu furmi doono si xal loogu helo ololaha lagu eedeynayo xukuumadda inay ku wado laba madaxweyne oo ka tirsan maamul Gobleedayda dalka.