Dowladda Kenya oo fulineysa qorshaheedii ahaa inay Derbi ku wareejiyo xuduudka ay la leedahay Soomaaliya ayaa ku dhaqaaqday tallaabo la filayay oo ah inay dhul Soomaaliyeed oo ka baxdsan xuduudkeeda ku darsato xuduudkeeda markii horeba muranka ka taagnaa, waxayna ku dhiiratay inay magaalada Beledxaawo ay derbiga dhex mariso.
Arrintaas waxaa ka hortegay dadkii degmada deganaa oo guryahooda la rabay in la burburiyo markii ciidamo Kenyaan ah oo ay la socdaan baabuurta dhismaha ay damceen inay burburiyaan guryahooda si Derbiga looga dhiso. Iska hor imaad kooban oo goobta ka dhacay waxaa qori looga furtay askari Kenyaati ah oo markii dambe dib loogu celiyay qorigii markii ay arrinta soo dhex galeen maamulka degmada.
Warbaahinta Afka Soomaaliga ku hadasha ayaa si weyn uga hadlay arrintan waxayna wareysiyo xaalad ka hadal ah la yeesheen dad kala duwan oo ku sugan degmada Beled Xaawo ee xuduudka ku taalla oo si faahfaasan uga warbixiyay wixii ka 28-ka May 2015 ka dhacay degmadooda iyo damaca Kenya.
Haddaba waxaa is weydiin leh haddii magaalooyinkii ay sidan u boobeyso Kenya, dhulkii magaalada ka baxsanaa sidee xaalkiisu noqonayaa…? Wadani.com waxay arrintan ka sii digtay, waxayna dowladda Soomaaliyeed iyo Baarlamaanka ugu baaqday inay arrintaas wax ka qabtaan.
Akhri qoramada Wadani.com
Baarlamaanka iyo xukuumadda ayaa marar kala duwan ka hadlay arrintan iyagoo sheegay inaysan waxba ka ogeyn qorshaha Kenya, kadibna waxaa la sheegay in Guddi loo saarayo arrintan oo dhinaca xukuumadda ah kuwaas oo markii ugu dambeysay la sheegay inay tegayaan degaanada Xuduudda.
Waxaa muuqata inay Kenya ku talo jirto wax ka bedelka xuduudka ay la leedahay Soomaaliya si ay u boobto dhul kale, waxaana hore u jiray qorshe kale oo ku saabsan Xuduudka Badda oo Kenya ay dhulkeeda ku darsatay oo dacwadiisu hadda taallo maxkamadda Caalamiga ah.
Cagajidka dowladda Federaalka wuxuu keeni doonaa in Kenya qorshaheeda u fuliso si degdeg, waxaana si degdega looga fadhiyaa dowladda inay tallaabo aan dib u dhac lahayn ka qaado arrintan ka qaadato oo aysan dadka shacabka ah ee Gedo ku nool ku fiirsan inay ka hortagaan dhul boobka Kenya.
Wadani.com
[ad name=”HTML-1″]
[ad name=”HTML-6″]
