Waxaa maanta magaalada Garowe dil qisaas ah lagu fuliyey Faarax Cabdi Maxamed oo hooyadiis ku dilay degaanka Jalam ee Gobolka Nugaal, arrintan oo ahayd mid naxdin leh.
Maxkamada Sare ee Puntland ayaa xukun kama danbeys ah oo Dil toogasho ah ku riday Faarax Cabdi Maxamed (Caagane). Muddo saddex bilood ka hor ayaa kiiskan laga furay Maxkamadda Sare ee Puntland, kadib markii dil naxdin leh u geystey hooyadiis Xaawo Jaamac Cabdulle.
Dilka qisaasta ah waxaa ku fuliyey eedeysanaha walaalkiis Caawiye Cabdi Maxamed (Caagane), waxaana la xaqiijiyey in ninka hooyadiis dilay laga soo celiyey qurbaha, isla markaana uu caafimaad qabay, isagoo diiday inuu sheego sababta uu hooyadii u dilay.
Qoyska ayaa isku raacay in la qisaaso Faarax oo dilay hooyadii, waxaana Ilmo Cabdi Maxamed waa 8 qof oo uu ku jiro ninka la toogtay, iyadoo wakiishay Caawiye inuu fuliyo qisaasta. Waxaana Xeer ilaalintu sheegta in dhaqaatiir badan ay baareen oo ay caddeyeen in caafimaadkiisu taam ahaa.
Dadka yaqaan Qoyska aya sheegay inay ku noolaan jireen dalka Holland, hooyo Caasha-na ay wiilkeeda si fiican ula dhaqmi jirtay, iyadoo isbedel ku yimid dalka lagu soo celiyey, kadibna ay hooyadii ka daba timid, balse ay gacantiisa sababsatay.
