Kulankii Khamiislaha ee Golaha wasiirada xukuumadda Soomaaliya ayaa saaka ka dhacay xarunta Xukuumadda ee Madaxtooyada Soomaaliya, waxaana ka baaqsaday kulanka Ra’iisal wasaare Cumar C/rashiid oo Muqdisho ku sugnaa.
Ilo xog-ogaal ah ayaa Wadani.com u sheegay in shirka golaha wasiirada ee maanta lagu waday in la keeno qorshe 10 safiir oo cusub lagu magacaabayo markii saddexaad dib u dhac u yimid.
Safiirada oo markii hore ay isku khilaafeen Madaxweynaha iyo Ra;iisal wasaarha ayaa kadib heshiis ku dhex maray magaalada Istanbul ee dalka Turkiga, laakiin waxaa ka hor yimid Guddiga Arrimaha dibadda ee Baarlamaanka oo ka war helay in qaab maamul goboleed loo qeybiyay safiirada cusub lana qadiyay qaar ka mida maamulada dalka.
Wasiiro iyo xildhibaano arrintaas dood ka qaba ayaa hareeyay maalmihii ugu danbeeyay xafiisyada madaxweynaha iyo Ra’iisal wasaaraha, waxaana xaaladda uga sii daray markii ay heshiiska gaareen madaxweynaha iyo Ra’iisal wasaaraha oo keligood isku koobay iyadoo aanu la socon wasiirka arrimaha dibadda.
Shirkii Golaha wasiirada ee maanta waxaa shir guddoomiyay Wasiirka Arrimaha gudaha C/raxmaan Odowaa iyadoo ay dalka ka maqan yihiin ku xigeenka ra’iisal wasaaraha iyo wasiiradii noqon lahaa kusimaha, waana markii labaad ee Ra’iisal wasaare Cumar C/rashiid ka maqnaado guddoominta Golihiisa wasiirada isagoo ku sugan Muqdisho.
Wadani.com
