Waxaa goor dhoweyd la soo gabagabeeyay codeyntii mooshinka laga keenay Ra’iisal wasaare C/weli Sheekh Maxamed oo muddo bil ka badan soo taxnaa, waxaana ugu danbeyn kusoo dhamaatay in kalsoonida lagala noqdo xukuumadda, sidaasina ku dhacdo iyadoo madaxweynaha looga fadhiyo inuu falkiisii ku noqdo soona magacaabo ra’iisal wasaare cusub.
153 waxay u codeysay in xukuumadda kalsoonida lagala noqdo
80 waxay u codeysay in xukuumadda sii jirto
2 waa ka aamustay
Tirade guud: 235
Wadani.com oo muddo kusoo jirtay baahinta wararka mooshinka iyo heerarkii uu soo maray waxay qormadan ku eegeysaa sidii uu danbeeyay mooshinka kusoo dhamaaday. Loolankii ugu danbeeyay ee shalay, xalay iyo maanta ka dhex socday gudaha Baarlamaanka waxaa loo adeegsaday dhaqaale xoog leh oo xildhibaannada looga daba yimid ilaa gudaha Baarlamaanka
Codka xildhibaanka oo xalay gaaray $20,000, waxaa lagu kordhiyay balanqaadyo iyo lacago kale oo farasaar ah, inkastoo qaar ka mida xildhibaannada oo ku dhow 10 ay saaka soo xaadirin ama uga tageen shirka arrimo kala duwan dartood.
Wasiir Faarax Sheekh C/qaadir ayaa ahaa ninka ugu weyn ee u xilsaarnaa ololaha gudaha Baarlamaanka kadhex socda ee saacadii ugu danbeysay ku jiray inuu soo jiito xildhibaanada taageersanaa Ra’iisal wasaaraha.
Sawirka hoose wuxuu muujinayaa heerka uu gaaray ololaha Faarax Sheekh C/qaadir, walow ay siyaasadu ku dhisan tahay lobby (olole) iyo is qancin haddana waxyaabaha yaabka leh ee madaxweynaha iyo saaxiibadii ku kaceen ayaa ah inay hantidii qaranka u adeegsadeen laaluush aan xishood lahayn iyo tiiyoo jagooyinka qaranka heshiisyo lagula galayo xildhibaanno beelo kasoo jeeda.
Mooshinka maanta soo dhammaaday wuxuu ahaa kii ugu cuslaa ee soo mara Baarlamaan Soomaaliyeed, marka la isku daro lacagta ku baxday ilaa bilowgiisii waxay gaareysaa 8 Milyan oo doolar.
Arrimaha sababay inuu dhaco Ra’iisal wasaaraha waxaa ugu waaweynaa:
- Isagoo aan diyaar u ahayn dagaal noocan oo kale ah
- Kooxda madaxweynaha oo aad u dhisan heysatayna awood dhaqaale iyo mid balanqaad jago, horena u soo martay tijaabadan oo kale
- Ra’iisal wasaaraha oon ku tiirsaneyn, isbaheysi iyo beel midna
- Kooxda Ra’iisal wasaaraha oo intooda badan mabda’ isugu yimid
- Iyo dhaqaalaha la adeegsanayo oo mar danbe ay bilaabeen kooxdani
- In Ra’iisal wasaaraha fudud yahay in la casilo oo ah caqiiqo ku fogaatay xildhibaannada
Isku soo wada duuboo ridista C/weli Sheekh Axmed kama dhigna in dhibaatadii siyaasadeed ee dowladda Federaalka ay dhammaatay, waxaana hadda la sugayaa magacaabidda Ra’iisal wasaare cusub iyo sidii looga ansixin lahaa Baarlamaanka iyadoo tani ay ka dhib badnaan doonto ridistiisa.
Wadani.com
Muqdisho-Somalia
