Sida uu shaaciyay xafiiska Ra’iisal wasaaraha Soomaaliya waxaa xalay kulan yeeshay Guddi hoosaadka ka hortagga fatahaadaha iyo Ra’iisal wasaare Xasan Cali Kheyre iyadoo xukuumadda ay bixineyso kharash lagu taageerayo howsha ka socota magaalada ee Carro-tuurka ah.
Ra’iisul wasaare Khayre ayaa lasheegay inuu Wasaaradda Maaliyadda faray fududeynta kharashaadka ku baxaya dadaallada looga hortegayo fatahaadda Beledweyne ee wadajirka ay u wadaan shacabka & Dowladda, si looga baajiyo fatahaad ku soo rogmata magaalada.
Warku ma sheegin kharashka ay bixineyso xukuumadda Soomaaliya, lagamana jawaabin halka ay mareen lacagihii hore ee Dowladda Soomaaliya u qoondeysay fatahaadda magaalada Beledweyne oo ay ku jiraan lacago ka yimid China iyo Jabuuti oo aan la ogeyn meel ay mareen.
Dadaallada iminka socda ayaa isugu jira; Carro-tuur lagu sameynayo meelaha uu jiinka webiga ka jilicsan yahay iyada oo la isticmaalayo agab u adkeysan kara biyaha muddo fog iyo furista kanaallo yar yar oo qeyb ka qaadan kara hoos u dhigidda biyaha webiga, waxaana guddiga Gurmadka Beledweyne uu shaaciyey inaysan dowladda Soomaaliya waxba soo gaarsiin marka laga reebo 500 jawaan.
Guddiga dowladda u qaabilsan fatahaadda ayaa sheegay in diyaarado lagu daabulayo agab dheeraad ah oo loogu tala galay in biyaha looga celiyo magaalada Beledweyne, si ay u guuleystaan dadaallada iyo iskaashiga shacabka iyo dowladda, looguna gogol xaaro hannaan ay bulshadu cabsi la’aan ugu noolaan karto magaalada.
Dhinaca kale waxaa maanta la filayaa in dhowr duulimaad ay tagaan magaalada Beledweyne, kuwaasoo sida Qalabka Carrada lagu dhubo ee adag.
