Shir aan caadi ahayn oo degdeg ah ayaa maanta la isugu yeeray Golaha Wasiirada Xukuumadda Soomaaliya, iyadoo warar kala duwan kasoo baxayaan ujeedka shirkaasi xilligan loo qabanayo.
Golaha Wasiirada ayaa Duhurnimada Maanta loogu yeeray inay kasoo qeyb galaan shirkan aan caadiga ahayn oo Ra’iisal Wasaare Xasan Cali Kheyre dalbaday inuu qabsoomo, waxayna wararku sheegayaan in shirkani looga hadli doono sharciga doorashada oo ka mida arrimaha ugu waaweyn ee xukuumadda ay ku heysteen siyaasiyiinta mucaaradka.
Sharciga Doorashada oo hore loo soo bandhigay ayaa waxaa gacanta ku haya xukuumadda Soomaaliya, iyadoo dood weyni ka taagan tahay qaabka ay u dhici doonto doorashada soo socota, wuxuuna sharcigan noqon doonaa mid culeyska ka dejiya xukuumadda oo doodiisu ay Baarlamaanka hareyn doonto, haddiiba uu kasoo gudbo xukuumadda.
Shirkan ayaa ku soo beegmaya iyadoo ay sii kordheen cadaadisyada siyaasadeed ee lagu hayo madaxweyne Farmaajo iyo Ra’iisal wasaare Kheyre, ayna shirar ka dhaceen Nairobi iyo Muqdisho, kuwaasoo lagu dhaliilay hoggaanka dowladda Soomaaliya iyo waxqabadkooda.
