Warar kala duwan ayaa ka soo baxaya xaalada hotelka Saxafi ee magaalada Muqdisho kadib markii ay saaka weerar qorsheysan ku qaadeen koox ka tirsan Alshabaab, rasaas goosgoos ah ayaa la maqlayaa iyadoo ay yaraatay rasaastii xoogga lahayd ee saaka muddo saacad iyo bar ka badan ka socotay Hotelka.
AMISOM ayaa sheegtay in hotelka ay gacanta ku dhigeen ciidamada dowlada iyo kuwa AMISOM sida ay ku qortay Twitter-ka, laakiin dadka u dhow hotelka ayaa ku waramaya inay weli socoto rasaas goosgoos ah oo qeybo ka mida dableyda Alshabaab ay hotelka ku jiraan.
Ciidamada GAASHAAN ee nabadsugidda ayaa la sheegay inay hadda isku dayayaan inay soo afjaraan dagaalka ay gudaha hotelka ka wadaan qof ama laba dabley ah kadib markii la dilay intii badbeyd dableyda weerarka soo qaaday.
Ma jirto ilaa hadda faahfaahin laga hayo qasaaraha ka dhashay qaraxa iyadoo ay xiran yihiin wadooyinka taga hotelka oo ay deganaayeen mas’uuliyiin iyo siyaasiyiin caana.
Weriye Mustaf Shafana oo weriye ka tirsan Radio Shabelle iyo Camareman Aljazeera u shaqeeya ayaa la xaqiijiyay inuu ku dhaawacmay weerarka saaka ka dhacay Hotelka Saxafi. Sidoo kale warar kala duwan ayaa kasoo baxaya dad caana oo ku dhintay hotelka, xaqiijinta wararkaasi ayaa socota weli.
Aljazeera ayaa sheegtay inaanu weriye uga dhiman weerarka hotelka saxafi, waxaase la xaqiijiyay in weriye u shaqeynayay Reuters uu dhaawac fudud ka soo gaaray weerarkii labaad.
Dhinaca kale Gen. Cali Caraaye (Gacmadule) ayaa isla la sheegay inuu dhaawac fudud soo gaaray iyadoo dad kale oo caana ay dhinteen, war hadda la helay ayaa sheegaya in milkiilihii hotelka Saxafi Ganacsade C/rashiidi Ilqeyte lagu dilay weerarkii saaka lagu qaaday Hotelkiisa Saxafi.
Wadani.com
