Dowladda Federaalka ayaa ciidamadii ugu badnaa ku daadisay wadooyinka magaalada Muqdisho si looga hortago dadweyne la qorsheeyay inay maanta dhigaan bannaanbax looga horjeedo Madaxweynaha xilkiisu dhammaaday ee Maxamed C/llaahi Farmaajo.
kadib markii ciidamada gorgor ee kumaandooska Milateriga ay weerarreen Hotelka Maa’ida oo ay ku sugan yihiin madaxweynayaashii hore ee Xasan Sheekh Maxamuud iyo Shariif Sheekh Axmed ayay ciidamada dowladda oo wata Beebayaasha iyo gadiidka dagaalka la wareegeen Taallada Daljirka Dahsoon oo bannaanbuxu ka dhici lahaa, waxaana gebi ahaan xiran wadooyinka magaalada oo dadka loo diiday inay gaadiid iyo socod midna ku maraan.
Bandowga aan la shaacin ee caasimadda lagu soo rogay ayaa saameynta ugu weyn ku yeeshay degmooyinka ku dhow Taallada Dajirka ee Boondheere, Xamarweyne Wardhiigley, Shangaani, iyadoo ay xiran yihiin Isgoyska Boondheere, agagaarka gurigii hore ee Saldhigga Shangaashi, Guriga Hooyooyinka ilaa agagaarka Iskuulka 15-May ayaa xiran waxaana la ogolayn in lagu dhowaada taalada Daljirka Dahsoon.
Dadka loo diyaariyey bannaabaxa xaafadahooda ku xayiran, waxayna askarta qaarkood rasaas kor uga ridayaan dadka isku daya inay diidaan amarka lagu joojiyay inay socdaan; waxaana awoodii ugu weyneyd ee dowladda loo adeegsaday in looga hortago bannaanbax.
Xaaladda ayaa u eg sida inqilaab dhacay, marka la eego ciidamada badan ee xerooyinka laga soo bixiyey ee wado waliba taagan, gaadiidka dagaalka ee ay wataan iyo in dhammaan la joojiyey isu socodkii dadka iyo gaadiidka agagarka Taallada Daljirka.
Wararkii ugu danbeeyay ayaa sheegay in bannaanbax ayaal uu hoggaaminayo musharax C/raxmaan C/shakuur uu socod ka bilaabay agagaarka Garoonka diyaaradaha, wuxuuna sheegay in dadka soo baxay ay yar yihiin, taasoo ay ugu wacan tahay inay ciidamada dowladda loo adeegsaday in la xayiro dadka, xalayna weerar lagu qaaday madaxweynayaashii hore.
“Farmaajo iyo Fahad meesha ay rabaan waa la isla tegi doonnaa, iyagaa magaaladan ka tegi doonna, iyagoo dulleysan… dadkaani dulqaad waa muujiyeen..” ayuu yiri Musharax C/raxmaan C/shakuur.
Dhinaca kale bannaanbaxyo kala gaara ayaa ka socda xaafadaha Muqdisho, waxaana qaarkood hoggaaminaya xildhibaanno iyo musharixiinta mucaaradka, kadib markii ciidamada hor istaageen isu socodka dadka.
