Xildhibaanno laga soo doorto Jubbaland oo taageero Madaxweynaha maamulkaasi Axmed Madoobe ayaa maanta taariikh ku dhigay Madaxweynaha Soomaaliya Maxamed C/llaahi Farmaajo.
Buuq iyo fowdo ayaa ka dhashay xafladii furitaanka kalfadhigii 7-aad ee Baarlmaanka Federaalka markii uu damcay Madaxweyne Farmaajo inuu khudbadiisa jeediyo, waxaana qaska lagu sameeyay madaxweynaha hoggaaminayey Xildhibaan Xasan Cabdi Ismaaciil (Xasan Yare).
Madaxweynaha ayaa dhowr jeer intii uu khudbadda waday soo hadal qaaday ninka Firimbiga wata, wuxuuna codsaday in la is ixtiraamo, halka Guddoomiyaha Barlamaanka uu magaca xildhibaanka ku dhawaaqay, kuna amray inuu fariisto, laakiin Xildhibaan Xasan Yare iyo xildhibaannada kale waxay sii wataan inay buuq ku furaan khudbadda Madaxweynaha.
Xildhibaan Xasan yare oo saxaafada la hadlay ayaa sheegay inuu Madaxweynaha soo hadal qaadin xaaladda dalka iyo dhibaatooyinka jira, wuxuuna ku eedeeyay inuu rabo muddo kororsi, khudbadiisna aysan la jaanqaadi karin xaaladda dalka.
Xildhibaan Xasan Yare iyo xildhibaanno inta badan kasoo jeeda Jubbaland ayaa si weyn uga horjeeda Madaxweynaha Soomaaliya, waxaana arrintaasi ay maanta ka dhex muuqatay furitaanka kalfadhiga 7-aad ee Baarlamaanka, wuxuuna madaxweyne Farmaajo taariikhda u galay inuu noqday Madaxweyne laga qasay khudbad Dastuuri ah.
