Dowladda Sucuudiga ayaa shaacisay inay 100 milyan oo doollar ugu yabooheyso dib u dhiska qeybo ka mid ah dalka Suuriya, gaar ahaanna woqooyiga dalkaasi oo kal hore laga qabsaday mintididinta kooxda Dowladda Islaamka, halkaasoo ay murasan yihiin dalalka Mareykanka iyo Turkiga.
Lacagtan uu Sucuudiga ku yaboohay ayaa la doonayaa in dib loogu soo celiyo adeegyadii aasaasiga ahaa ee gobolkaasi oo ay hadda maamulaan maleeshiyaadka Kurdiyiinta u badan ee uu Mareykanka taageero, waxaana ka mida deegaanada lacagta Sucuudiga ka faa’iideysan doona magaalada Raqa oo ku burburtay dagaalkii looga xoreynayay kooxda Daacish.
Mareykanka ayaa soo dhaweeyay yabooha Sucuudiga waxa uuna sheegay in xasilinta gobolkaasi ay muhiim u tahay in kooxda Daacish aysan mar kale ku soo laaban gobolka. Dowladda madaxweyne Bashar Al-Asad ee Suuriya wali kama aysan hadlin yaboohaasi Sucuudiga.
Dowladda Sucuudiga iyo waddamo kale oo Carbeed ayaa taageerayay kooxaha kacdoon wadeyaasha ahi ee doonayay in ay ka takhluusaan dowladda madaxweyne Asad. Balse dowladaha Iiraan iyo Ruushka ayaa garab istaagay dowladda Suuriya.
Dalka Turkiga oo dowladda Ruushka aad ugu dhow, hadda uu muran kala dhaxeeyo Mareykanka ayaa kal hore ku gacan seyray taageerada Mareykanka ee maleeshiyaadka Kurdiyiinta.
Yabooha Sucuudiga ayaa ku soo beegmaya xilli muran xooggan uu hadda ka dhex taagan yahay Mareykanka iyo Turkiga. Waxaana arrrintan loo arkaa Sacuudiga oo Mareykanka ku taageeraya xiisada kala dhaxeysa dalka Turkiga.
