Dowladda Sacuudiga ayaa dib u furtay Kacbada barakeysan ee magaalada Maka Almukarama. kadib markii ugu horeysay inta la ogyahay laga saaray dadkii ku cibaadeysanayey iyo kuwii ku dawaafayey ee muslimiinta ahaa.
Dowlada Sacuudiga ayaa sheegtay in Kacbada iyo wareegga Masjidka Xaramka laga fuliyey howlgal nadiifin ah oo baaxad leh si looga hortago in cudurka Coronavirus uu halkaasi gaaro, waxaana dib loo furay aroortii saaka, iyadoo kaliya loo ogolyahay inay dadka aan cumreysaneynin.
Hore ayuu Sacuudiga u mamnuucay in muslimiinta dunida ay Cumro u tagaan Sacuudiga, kadibna waxaa dadka dalkaasi ee gudaha laga mamnuucay inay cumreystaan ilaa amar dambe, iyadoo dadka gudaha ay kaliya Kacbada ku wareegi karaan waqti kooban.
Waxaa dunida Muslimka ay markii ugu horeysay arkeen iyadoo Kacbada Bakareysan ay cidlo tahay oo aanay dad joogin, iyadoo muuqaalkaasi ay dad badan ka naxeen oo faallooyin badan laga bixiyey, waxayna aahayd markii ugu horeysay ee la arko Kacbada oo cidlo ah.
Sacuudiga ayaa uu shaaciyey inuu karantiilay 8 qof oo qaba cudurka Coronavirus oo intooda badan kasoo laabtay dalka Iiraan, waxaana diyaar garow weyn loogu jiraa sidii looga hortegi lahaa, iyadoo la xiray xarumaha waaweyn sida Kacbada iyo Masjidka Nebiga SCW ee magaalada Medina.
