Dowladda Boqortooyada Sacuudiga ayaa wada qorshe mashruuc la baxay “Salwa Marine Canal Project” oo kanaal weyn y uga qodeyso xuduudka ay la leedahay dalka Qatar, kaasoo dalka yar ee deriska la ah u bedeli doona jasiirad an lahayn dhul ay la wadaagto dalalka kale.
Warkan oo uu qoray wargeyska Makkah ee dalkaasi kasoo baxa ay la sheegay in kanaalka lag qodayo meel 1 KM u jirta xuduudka Sacuudiga uu la leeyahay Qatar, waxaana dhererkiisa uu noqon doonaa 60 KM, iyadoo hoos loo qodi doono 15 ilaa 20 mitir, halka balaciisu noqon doono 200 mitir.
Kanaalkaasi ayaa la sheegay in biyo laga buuxin doono, iyadoo kadibna la dhigi doono meel lagu aaso haraaga niyukliyeerka la filayo inuu Sacuudigu sameysto warshado ku shaqeeya. waxayna arrintan sii xoojin doontaa xayiraadda saaran Qatar iyo caddowtinimda sii xoogeyaneysa ee labada dal.
Dhismaha mashruucan ayaa waxaa u tartamay 5 shirkadood, iyadoo ay ku bixi doonto lacag dhan 750 Milyan oo doolar, isagoo socon doona hal sano, waxaana shirkadda ku guuleysatay lagu dhawaaqi doonaa muddo saddex bilood gudahood ah, halka ay maalgelinayaan dowladaha Sacuudiga iyo Imaaraadka.
Waxaa la sheegay in dhulka xuduudka Sacuudiga iyo Qatar uu noqon doono aag milateri, isla markaana gebi ahaan uu soo idlaan doonto xiriirkii ganacsi ee labadaas dala oo muddo sanad ka badan la joojiyey.
