Shirka Ra’iisal wasaaraha xilka sii haya Maxamed Xuseen Rooble iyo Midowga Musharixiinta ku yeesheen Hotelka ku dhex yaalla Garoonka Aadan Cadde ee Muqdisho ayaa isla markii uu furmay muuqaal kale yeeshay.
Inkastoo wadahadalku yahay dariiqa kaliya ee xal lagu gaari karo, haddana isla markii uu shirku furmay wuxuu yeeshay muuqaal shaki leh oo hareeyay qaabka uu u dhacayo iyo sida loo wadahadlayo, waxaana arrimaha uga sii daray markii ay ka baaqsadeen xubno ka mida musharixiinta.
Muuqaalka cusub ee shirku yeeshay ayaa lagu soo koobi karaa:
1- Shirku wuxuu u ekaaday mid beeleed, marka la eego ergada soo abaabushay iyo qaabka uu ku dhacay, taasoo muujineysa inaysan Ra’isal wasaaraha kala qeyb gelin wasiirada xukuumadiisa.
2- Ka maqanaanshaha shirka ee Ra’iisal wasaarihii hore Xasan Cali Kheyre iyo Shariif Xasan Sheekh Aadan ayaa dhinaca kale keenay shaki ku saabsan in shirku isu bedelo mid kulmiyey siyaasiyiin beel qura kasoo wada jeeda.
3- Arrinta ugu weyn ee intii aanu shirku furmin taagneyd ayaa ahayd in Ra’iisal wasaare Rooble aanu go’aan gaari karin, taladuna ka go’do Maxamed C/llaahi Farmaajo, taasoo heshiis kasta oo la gaaro aan la hubin waxa uu ku danbeyn doono, haddiiba la is afgarto.
Si kastoo natiijadu shirku noqoto wuxuu shirka Rooble iyo qaar ka mida Musharixiinta yahay tallaabo dhinaca nabadda loo qaaday oo hadii aysan ka faa’iideysan madaxda dowladda Federaalka ay xaaladu dib ugu noqon karto is mari waagii hore.
GOOBJOOGE
