Safiirada 15-ka dal ee Golaha Amaanka Q/Midoobay oo maanta socdaal maalin ah ku tegay magaalada Muqdisho ayaa la sheegay inay natiijo la;aan iyo niyadjab ku abuurtay walaac kala laabteen, kadib markii ay suurageli weyday arrintii ugu weyneyd ee ahayd in la ansixiyo Heshiiska Qaabka Doorashada 2016.
Safiirada oo kulamo kala duwan la yeeshay Degaanka Xalane ee sida weyn loo ilaaliyo madaxda dowladda Federaalka, maamulada iyo ururada bulshada ayaa kulankoodii ugu danbeeyay waxay albaabada u xirteen madaxweyne Xasan Sheekh Maxamuud iyo Ra’iisal wasaare Cumar C/rashiid.
Kulanka ayay si cad ugu sheegeen xubnaha Safiirada Golaha Ammaanka inay aad uga walaacsan yihiin dib u dhaca ku yimid ansixinta heshiiska qaabka doorashada 2016, waxayna ku adkeysteen in degdeg Baarlamaanka Soomaaliya u ansixiyo heshiiska doorashada si loo bilaabo qabanqaabada doorasahada.
Madaxweyne Xasan Sheekh ayaa xubnaha Golaha Ammaanka u balanqaaday in doorashada 2016 ay dhici doonto xiligii loogu talogalay oo aanay ka daba mari doonin August 2016, arrintaasi oo noqotay waxa kaliya ee wafdiga Golaha ammaanka ay kala laabteen Muqdisho.
Safiirada Golaha Ammaanka waxay madaxweynaha iyo Ra’iisal wasaaraha u sheegeen inaysan jiri doonin muddo kordhin oo waqtiga haray la isugu geeyo ansixinta qaabka doorashada iyo qabanqaabada doorashada si aaan dib u dhac lahayn.
Ergyga Q/Midoobay u qaabilsan Soomaaliya Micheal Keating ayaa bartiisa Twitter-ka ku sheegay in wadahadalka labada dhinac ay hareeyeen welwelka laga qabo dib udhaca jiitamada ee ku yimid ansixinta heshiiska Doorashada ee rmadaxda madasha Qaran ay ku heshiiyeen bartamihii April 2016.
Maanta ayaa lagu waday in baarlamaanka federaalka ansixiyo heshiiska qaabka doorashada 2016, taasoo culeys badan lagu saaray, iyadoo madaxweynaha uu tegay Baarlamaanka kana codsaday arrintan, balse lagu fashilmay.
Wadani.com
