Guddoomiyaha Golaha Guurtida Somaliland Saleebaan Maxamud Aadan (Saleebaan Gaal) ayaa shaaciyey in Ra’iisal wasaaraha Itoobiya Abiy Ahmed uu ku cadaadinayo Somaliland inuu magaalada Hargeysa uu keeno Madaxweynaha Soomaaliya Maxamed C/llaahi Farmaajo.
Xukuumadda ayuu sheegay inay diidan tahay cadaadiska, laakiin wuxuu ka hor sheegay golaha Guurtida in Farmaajo lagu soo dhoweyneyn Hargeysa, isla markaana aanu isku imaan, laakiin haddii uu yimaado isagoo la socda Abiy Ahmed aysan soo dhoweyn doonin.
“Farmaajo waxaan leenahay kusoo dhoweyn meyno, hana noo imaanin, Abiy Ahmed waxaan leenahay hanoo keenin.. laakiin haddii isagoo xambaarsan uu yimaado.. maxaan yeeleynaa..? midna waan soo dhoweyneynaa, midna soo dhoweyn meyno..” ayuu yiri Saleebaan Gaal.
“Haddii uu la yimaado.. dili meyno laakiin Madaxweyne uma ictiraafsanin…cudurdaar ma bixin, wixii uu yiri dib ayuu u cunay.. denbigii wuxuu u qeybiyey dadkii iyo dowladii dadkeeda dhibeysay, wuxuu yiri qolo waliba waa lahayd dhibaato..” ayuu mar kale yiri Guddoomiyaha Guddiga Guurtida Somaliland oo raaligelitii Madaxweyne Farmaajo siiyey Gobollada Waqooyi ku sheegay mid aanay waxba ka jirin.
Ra’iial wasaaraha Itoobiya Abiy Ahmed ayaa 11-kii bishan Febraayo magaalada Addis ababa ku kulansiiyey Madaxweynaha Soomaaliya Maxamed C/llaahi Farmaajo iyo madaxweynaha Somaliland Muuse Biixi, iyadoo uu jiro qorshe lagu doonayey in Farmaajo iyo Abiy Ahmed ku tagaan magaalada Hargeysa, taasoo uu ka biyo diiday Muuse Biixi.
