Taliyihii hore ee Hay’adda Nabadsugidda Soomaaliyeed iyo Taliyaha cusub ee xilka la wareegay C/llaahi Maxamed Cali (Sanbaloolshe) wuxuu xilka ku soo laabtay iyadoo ay jirto xaalad adag oo amni iyo maamul cusub oo wada socda.Sanbaloolshe bilihii uu soo qabtay xilka agaasimaha NISA wuxuu isku dayay inuu soo celiyo nidaamka, gacan bir ahna ku qabto awoodaha kala duwan ee caasimadda ku dhex jira inta aan la gaarin Alshbaab.
Arrintaas waxay ahayd qorshe uu si weyn ula dhacay madaxweynihii hore ee Xasan Sheekh iyo saaxiibadiisii xilka haya, halka ay kasoo horjeesteen mas’uuliyiin iyo beelaha hubeysan ee magaalada Muqdisho.
Agaasime Sanbaloolshe wuxuu mar waliba doodiisu ahayd inaan ammaanka Muqdisho waxba laga qaban karin inta la xakameynayo dadka ka baxsan awoodda dowladda, hubkana laga dhigayo dadka hubeysan ee ka baxsan ciidamada dowladda.
Qorshahan wuxuu ahaa midkii dhaliyay dagaalkii weynaa ee NISA ku qaaday Guddoomiyihii hore ee degmada Wadajir iyadoo loo adeegsaday AMISOM, halkaasoo qasaare weyn ka dhacay, isla markaana xaalada adag ka dhalatay.
Agaasime Sanbaloolshe inkastoo ay ka go’neyd inuu meesha ka saaro awoodaha is barbar yaacaya iyo xakameynta hubka faraha badan ee Muqdisho, si kastoo qorshahaasi u wanaagsanaa wuxuu ka fuli waayay xukuumadii C/weli Sheekh oo isagiina xilka ka qaaday, iyadiina aan ka danbeyn ee khilaafkii ka dhashay loo riday.
Arrimaha ugu waaweyn ee qorshihii Sanbaloolshe dhiciseeyay ayaa ahaa: isagoo ah qof caadifi ah oo madaxda iyo beelaha aan ixtiraamin, mararka qaarkoodka aflagaado kula kacaa, iyo isagoo go’aano waaweyn si degdeg ku qaata.
Markii xilka laga qaaday ayuu Sanbaloolshe sheegay inuu xilkiisa ku waayay khilaaf siyaasadeed oo uu ku dhex dhacay, laakiin haddii ay markan soo martay fursad kale waxaa muhiim ah inuu qaato tallooyinka soo socda:
1 – Inuu iska ilaaliyo beegsiga beelo iyo dad gaara
2 – Inuu ku shaqeeyo qorshe guud oo dowladda u dhigto ammaanka caasimadda
3 – Iyo inuu ka amar qaato madaxda ka sareysa
4 – Inuu xakameeyo hubka faraha badan iyo shirkadaha ammaanka ee ka jira magaalada
5 – Inuu ciidamada faraha badan ee ilaalada mas’uuliyiinta dowladda iyo maleeshyiyooyinka la qaabeeyo
6 – In ciidamada ammaanka iyo kuwa NISA wada shaqeeyaan si looga badbaado isku dhac
FAALLADA GOOBJOOGE.COM
