Maxkamadda Ciidamada Qalabka Sida ayaa xukun Dil Toogasho ah ku riday Sarkaal hore uga tirsanaa ciidamada dowladda oo fududeeyay mas’uulka ka ahaa weerar ay xubno ka tirsan Alshabaab ku haleen xarunta Xalane.
Ninkan oo ciidamada Military-ga dowladda ka mid ahaa ilaa xiligii Dowladdii Cabdullaahi Yusuf ayaa lagay magacaabaa Maxamed Cabdulle Nuur Abkow, waxaa la sheegay inuu ka haray Liiska Ciidamada Xoogga Dalka ee lagu diiwan geliyay Nidaamkaa Electronic ahaa ee dowladdii Madaxweyne Farmaajo 2018.
Waxaa la sheegay inuu Sanadii 2017 kii bilaabay la-shaqaynta Alshabaab, isagoo Al-Shabaab u qaabilsanaa Gudbinta Gawaarida Qaraxyada ah Ee ay ku weerari jireen Muqdisho. Wuxuu isticmaali jiray Magiciisa iyo Kaarkiisa Aqoonsiga isago oo aan ku jirin Liiska Saraakiisha xoogga dalka oo uu ka gaaray Laba Xidigle.
Maragyada wax laga waydiiyay Maxamed Cabdulle Nuur Abkow waxa ay Qireen in shaki badani ka qabeen intuu uu kamid ah Saraakiisha ku Qoran Villa Baydhabo ee aan howlaha Ciidamada ku Jirin .
September 19 keedii 2019 ayaa lagu helay in uu Qarax geeyay Ururka 38 Aad Ee degan Villa Baydhabo. Sidoo kale 23 kii March Sanadkan ayuu ku geliyay Gaarigiisa Garoonka Diyaaradaha Laba ka tirsan Al-Shabaab, waxaana weerarkaasi ku naf waayay Cabdirisaaq Aabi Cali oo kamid ah raggii soo afjarayay weerarkaas.
Maxkamadaynta Eedeysane Maxamed Cabdulle Nuur Abkow ayaa lasoo afjaray, waxaana Maxkamadda lagu soo bandhigay Muuqaalka Camerooyinka Amniga Ee CCTV Garoonka duubeen xilligii uu gudbinayay raggii weeraray Garoonka.
Maxkamadda Ciidamada Qalabka Sida ayaa maanta Maxamed Cabdulle Nuur Abkow (Biyamaalow) ku xukuntay Dil toogasha ah, taasoo ah qisaasta Marxuum Cabdirisaaq Aabi Cali, sida uu sheegay Gaashaanle Sare Xasan Cali Nuur Shuute Guddoomiyaha Maxkamadda Darajada Koowaad Ee Ciidamada Qalabka Sida.
