Duqii hore ee magaalada Gaalkacyo Col. Saciid Cabdi Faarax ayaa sheegay in sarkaal ka tirsan qunsuliyada Itoobiya ee Garoowe uu xoog ku haysto guri uu ku leeyahay magaalada Garoowe.
Col. Saciid Cabdi Faarax oo Waraysi siiyey Radio Daljir ayaa sheegay in gurigiisa uu kuyaala Xaafada kowda Agoosto ee magaalada Garoowe ee caasimada Puntland.
Waxa uu sheegay in dowlada Puntland ku tiri Sarkaalka Itoobiyaanka ah in guriga uu ku jiro uusan meelna uga bixin taasina ay tahay arrin uu aad uga xumaaday.
Duqii hore ee Gaalkacyo ayaa sheegay in uu Wasaarado badan oo Puntland iyo Maxkamada sare u maray sidii uu gurigiisa ku heli lahaa balse aysan arrintiisa waxba ka qaban.
“Adeer guriga aan ka hadlaayo waa guri aan leeyahay oo ku yaalo Degmada Garowe, Xaafada Agoosto Magaceyga waa Siciid Cabdi Faarax Duqii hore ee Gaalkacyo, waxaa degan guri nin ka mid ah kuwa Qunsuliyada jooga oo dhanka Safaarada u qaabilsan arimaha Millateriga, Gurigaasi muddo ayuu deganaa aniga dalka waan ka maqnaa, qoladii deganeyd ayaa ka kireysay markaan dalka ku soo noqday Gaalkacyo ayaan shaqo u aaday kadib markii aan Garowe u soo guuray ayaan ku iri hala ii baneeyo, maadaama heshiiskii uu sidaasi ahaa.” Ayuu yiri Duqii hore ee Gaalkacyo.
Sidoo kale waxa uu sheegay in uu marar badan isku dayey in uu arrintan kala hadlo Madaxweynaha Puntland Cabdiweli Gaas balse laga celiyey aqalka Madaxtooyada mar danbase uu Taleefanka ku helay si cad ugu sheegay ineysan Qunsuliyadu ka baxayn guriga.
Ugu danbeyntii waxa uu baaq u diray Shacabka Puntland gaar ahaana kuwa reer Garoowe in ay gacan ka siiyaan sidii uu u heli lahaa gurigiisa oo ay maanta banaanka ka joogaan isaga iyo qoyskiisa.
Arintan ayaa muujinaysa sida Itoobiyaanka ugu xidideysteen gudaha Soomaaliya, heer ayaa gaareen inay u awood sheegtaan Soomaalida dalkooda ku sugan.
Wadani.com
