Sawir siyaasadeedka ee Madaxweyne Axmed Cabdi Karie Qorqor iyo Xildhibannada kala ah Cabdiraxman Cabdishakur, Saadaq Cumar Xassan, iyo Cabdullahi Aadan Kulane
Waxgarad fiican ayaa ka diday, dhibsaday sawirka siyaasadeedka ku wada jiraan Madaxweyne Qorqor iyo saddexda Xildhibaan Cabdiraxman Cabdishakur, Cabdullahi Aadan Kulane, iyo Saadaq Cumar Xassan oo ah sawir Madaxweyne Qorqor la habboonaday sida laga garan karo qoraalka Cabdiraxman Cabdishakur soo dhigay bartiisa Facebook.
Kulanka sawirka lagu qaaday sawirka waxaa abuubalay Madaxweyne Qorqor saacad dambe ee habennimo, kuna casumay Cabdiraxman Cabdishkur faahfaahin la’aan. Wararka waxay sheegayaan in kaddib markii la ogaaday in Xildhibaan, Musharrax Madaxweyne Cabdiraxman Cabdishakur ka ambabaxayo Magaalada dhuusamareb, horeyna loola socday in Cabdiraxman Cabdishakur dabajoogo gaboodfal ku dhacay asaga, ilaaladiisa, iyo madax kale 17kii Disember 2017, kaddib markii lagu weeraray gurigiisa, ayaa Madaxweyne Qorqor abaabulay kulan kedis ah.
Gaboodfalkaas waxaa lagu eedeynaya Ciidammo ay madax ka ahaayeen labada xildhibaan Saadaq Cumar iyo Cabdullahi Kulane oo kala tirsanaa Ciidanka Booliska iyo Ciidanka Nabadsugidda, haseyeeshe Madax Sare ay bixiyeen amarka weerarka lagu dilay 5 askari oo ahaa Ilaalada Cabdiraxman Cabdishakur, kana tirsanaa Ciidanka xoogga dalka iyo qof haween ah, waxaana lagu dhaawacay asaga iyo madax kale ee la joogtay.
Ilaa maantana waxaa la raadinaya halka lagu aasay meydka 5ta askari iyo qofka dumarka ah ee la dilay. Sida hadda ka hor uu sheegay Guddoomiyaha Aqalka Sare ee Barlamaanka Federaalka muddo xileedkiisa dhammaday Cabdi Xaashi, dhaqan xumada Madaxweyne hore Maxamed Cabdullahi Farmajo ku soo kordhiyay siyasadda Soomaaliya waxaa ka mid ah shirar iyo sawirro si kedis ah loo qaado, kaddibna baraha bulshada lagu faafinayo si dadweynaha loo marin habaabiyo ama shaki loogu abuuro. Waa laga fiicnaa in Madaxweyne Qorqor oggolaado in la qaado sawir tuhun iyo muran siyaasadeed abuuraya, kaddibna baraha bulshada la soo geliyo.
Haddii ujeedadiisa aheyd in xal laga gaaro dhibaatada Cabdiraxman Cabdishakur tirsanayo waxay aheyd inuusan sawirka ku mashquulin. Eedda Saadaq Cumar iyo Cabdullaahi Kulane waxay tahay inay dadweynaha la wadaagan dhibaatada dhacday isla markaana caddeeyaan Madaxda Amarka soo siisay, kuwaasoo ilaa maanta aan dadweynaha la wadaagin sababaha ay amarkaas u bixiyeen iyo ujeedada ka dambeysay, iyo sababaha ay sharciga u raaci waayeen inay dambi ka hortagayeen. Saadaq Cumar iyo Cabdullahi Kulane waxay ahaayeen amar fuliyayaal fuliyay amar sharcidarro ah.
Arrimaha furaha u noqon kara xalka gaboodfalka dhacay 17kii Disember 2017 waxaa ka mid ah:
1. In warbaahinta iyo hay’adaha xuquuqul Insaanka iyo dadweynaha la soo tuso qubuurihii lagu aasay meydka.
2. In labada xildhibaan sheegaan Madaxda Sare ee siisay amarka lagu weeraray Cabdiraxman Cabdishakur, hadafka weerarka, qarinta meydka, iyo sababaha aan gargaar caafimaad loogu fidin dadkii dhibaatada ka soo gaartay.
3. In Dowladda Federaalka bixiso magdhaw iyo xaalmarin daahfuran ee la siinayo dhaxaltooyada muwaadiniintii la dilay iyo Cabdiraxman Cabdishakuur iyo intii kale ee dhibaatada ka soo gaartay weerarkaas.
4. In mushaar joogto ah loo qoro xaasaskii, caruurta, iyo waalidiinta ay ka tageern dadkii xaqadarrada lagu dilay.
5. In Cafis bixiyaan dhaxaltooyada 6dii qofood ee la dilay, intii dhibaatada ka soo gaartay gaboodfalkaas ee uu ku jiro Cabdiraxman Cabdishakur.
Waxaan qabaa in Xildhibaan Cabdiraxman Cabdishakur Warsame ku adkeyd inuu diido sawirka Madaxweyne Qorqor ku taliyay, haseyeeshe ma filayo inuu wax ka beddelayo inay lagama maarmaan soo afjaridda daahfuran ee weerarkii dhacay 17kii Disember 2017.
Madaxweyne Qorqor iyo Xildhibaan Cabdiraxman Cabdishakur waxaa ka dhexeeya mas’uuliyad wada shaqeyn iyo is tixgelin guud madaama ay wada matalaan danaha dadka iyo deeganka Galmudug. Xildhibaan Saadaq Cumar iyo Xildhibaan Cabdullahi Kulane waxaa la gudboon inay mas’uuliyadda gaboodfalka ku wareejiyaan Madaxdii siisay amarka sharcidarrada ah, isla markaana ka qayb qaataan ka bogsashada dhibka dhacay. Haddii labada Xildhibaan aysan ka qayb qaadan gaboodfal loo geystay Cabdiraxman Cabdishakuur waxaa u furan inay caddeeyaan.
W/Q: Dr. Maxamud M Culusow
