SAWIRRO: Kooxda Daacish oo lagala wareegay gacan ku haynta magaalada taariikhiga ah ee Mosul

Ciidamada Ciraaq ayaa xaqiijiyay inay si buuxda ula wareegeen magaalada taariikhiga ah ee Mosul inay ka saareen kooxda minditiinta Daacish oo mudo sadax sano ah gacanta ku haayay magaaladaasi.

Xoogaga Daacish ayaa dagaallo adag kula galay ciidamada Ciraaq si ay u difaacdaan Mosul, hase ahaatee xulufada dagaalka Daacish ka dhanka ah ayaa duqeymo hawada ah ku burburiyay awoodii Daacish ee magaalada Mosul.

Ciidamada Ciraaq oo ay hawada ka taageerayaan diyaaradaha dagaalka ee xulafada Maraykanka ayaa tan iyo 17-kii Oktoobar ee sanadkii hore waxa ay isku dayayeen in ay qabsadaan Mosul.

Hoggaamiyha Daacish ayaa bishii Juun ee 2014 waxa uu Mosul kaga dhawaaqay “Khilaafo” uu sheegay in ay ka arimiso Ciraaq iyo Suuriya.

Haseyeeshee sagaalkii bilood ee lasoo dhaafay waxaa laga qabsanayay dhul ballaaran oo ka tirsan labadaasi dal.

Dagaalka ka dhanka ah ururkaasi ayaa waxaa ku lug leh Kurdiyiinta, Suniyiinta Carabta ah, maleeshiyaad Shiico ah oo dhammaantood garab ka helaya xulafada Maraykanka.