Booliska dalka Ingiriiska ayaa shaaciyey magaca iyo halka uu kasoo jeedo asalkiisa ninkii gaariga ku jiiday jidgooyo amniga loogu talagalay oo ku taalla dhismaha baarlamaanka UK ee magaalada London shalay.
Ninkan ayaa la sheegay in lagu magacaabo Salih Khater. Waxayna sheegeen Booliska inuu yahay muwaadin dhalashada Britain haysta balse uu asal ahaan ka soo jeedo dalka Sudan, iyadoo baaritaan ku socdo waxa ku qasbay weerarka, laakiin wuxuu diiday inuu gacan siiyo booliska ama faahfaahin bixiyo.
Salih Khater ayaa da’diisu tahay 29 sano jir qaxootinimo uga tegay dalka Suudaan, waxana dhalay aabe beerayley, isagoo deganaa magaalada Birmingham, halkaasoo uu safar qaatay lix saacadood ku yimid magaalada London intii aanu geysan weerarka.
Waxaa la rumaysan yahay in hay’adda sirdoonka ee MI5 iyo booliiska argagixiso la dagaalanka aysan la soconin ninkaas, balse booliiska kale ee caadiga ah ay aqoon u lahaayeen.
Labo ruux ayaa isbitaal loo qaaday markii uu dhibkaasi dhacay, markii dambe ayaana laga saaray halka hal ruux oo kalana isla goobtii lagu daweeyay.
