Munaasabad si weyn loo soo agaasimay ayna kasoo qeyb galeen qeybaha kala duwan ee bulshada oo isugu jira aqoonyahano, waxgarad, ganacsato, dhalinyaro, haween iyo caruur oo kor u dhaafayay kumanaan kun, kumanaan kalana ay qaadi waysay goobtii loogu talo galay in lagu soo dhaweeyo ra’iisal wasaarihii hore ee Soomaaliya mudane Maxamed C/llaahi Farmaajo ayaa lagu qabtay magaalada Johannesburg ee dalka Koonfur Afrika.
Munaasabadaan oo ay ka hadleen xubno kala matalayay ururada Jaaliyaddaha Sooomaalida ee ku dhaqan sagaalka gobal ee dalkaani Koonfur Afrika uu ka kooban yahay ayaa ka codsaday mudane Farmaajo inuu noqdo musharaxa madaxweynaha Soomaaliya doorashooyinka lagu wado inay dhacaan sanadka 2016-ka. iyagoo u sheegay inay illaahey uga baryayaan inu ku guuleeyo xilka madaxweynenimada Soomaaliyeed, waxayna intaa ku dareen inay u arkaan inu yahay ninka kaliyah ee samata bixin kara ummadda Soomaaliyeed ee colaaduhu iyo maamul xumadu dib u dhigeen 25-kii sano ee lasoo dhaafay.
Safiirka Soomaaliya u jooga dalka Koonfur Afrika danjire Jamaal Maxamed Barrow oo ka qeyb qaadanayay soo dhaweynta ballaaran ee loo sameenayay Ra’iisal wasaarihii hore ee Soomaliya Mudane Maxamed C/llaahi Farmaajo ayaa sheegay inay ku faraxsan yihiin inay soo dhaweeyaan mas’uul xil culus ka soo qabtay dalka Soomaaliya oo booqasho ugu yimid jaaliyadda Soomaaliyeed ee ku nool dalkaani Koonfur Afrika.
Mudane Maxamed C/llaahi Farmaajo oo ah Ra’iisal wasaarihii hore ee Soomaaliya oo booqasho ku yimid dalka Koonfur Afrika oo ay ujeedadiisu tahay in midnimo iyo isfahan ay gaaraan bulshada Soomaaliyeed ee dunida dacaladeed iyo gudaha dalka kunool ayna u yeelan lahaayeen qaaraan qaran. Wuxuu intaa ku daray dib u dhaca Soomaaliya iyo sida wadamada Afrikaanka oo qaatay xoriyadooda Sooomaaliya kadib markii aan xorownay 1960-kii.
Wuxuuna ku taliyay in looga daydo dowladahaas sida ay ku mideeyeen ummaddahooda oo ku kala duwan; diin, luqad iyo dhaqanba. Wuxuu sidoo kale tilmaamay in Soomaaliya oo wadaagta wax walba, waxay ku kala duwan yihiina ayan jirin inay 25 sano kadib ay u qeybsan yihiin reer reer, taasina ay tahay wax aad laga xumaado, howshaasna waxaa ka gaabiyay hogaanka Soomaaliya.
Dhanka kale wuxuu ku adkeeyay shacabka Soomaaliyeed ee Koonfur Africa inay gacan siiyaan safaaraddooda ayna la shaqeeyaan safiirka cusub ee dhawaan loo magacaabay danjire Jamaal Maxamed Barow. Mudane Farmaajo kadib markii loo sameeyay xafladii soo dhaweynta wuxuu si gaar gaar ah ula kulmay, Howlwaeenada Safaaradda, ururada haweenka, dhalinyarada, odayaasha, ganacsatada iyo aqoonyahanada kuwaasoo uu ka dhageystay talooyinkooda ku aadan dib usoo celintii qaranimadii Soomaaliyeed, waxayna isla garteen inuu mar kale usoo noqdo uuna siiyo waqti intaan ka badan si aragti ballaaran ay usoo jeediyaan.
Ugu danbeyn Mudane Farmaajo oo soo gabagabeeyay booqashadiisa ayaa faray in Jaaliyada Soomaaliyeed ay ka qeyb qaataan qaaraanka qaran ee ay ka qeyb qaadanayaan qurbajoogta Soomaaliyeed ee ku dhaqan wadamo badan oo caalamka ah, ayna ka shaqeeyaan sidii loo badbaadin lahaa qaranimada Soomaaliyeed.
Mahad Maxamed Sheikh (Istiila)
E-mail: [email protected]
Pretoria, South Africa
[ad name=”HTML-7″]
