Majaajiliiste caan ku ah dhinaca masraxiyadda oo u dhashay dalka Jarmalka ayaa xiisad ka dhex abuuray dalalka Turkiga iyo Jarmalka kadib markii uu barnaamij majaajilo ah oo ku dhisan jeesjees uu ku aflagaadeeyay Madaxweynaha Turkiga Rajab Dayib Ordogan.
Majaajiliistaha Jarmalka oo lagu magacaabo Jan Boehmermann wuxuu aflagaado kula kacay madaxweynaha Turkiga isagoo ka hadlayay TV laga leeyahay Jarmalka, isagoo akhriyay Gabay lagu aflagaadeeyay Madaxweynaha Turkiga oo kaliya aan ku tilmaamin inuu yahay keligii taliye balse ku sifeeyay nin caruurta jinsi ahaan uga faa’iideysta.
Dowladda Turkiga ayaa ka dalbatay inay ogolaadaan in dacwad lagu soo oogo majaajiliistaha reer Jarmal ee aflagaadeeyay madaxweyne Ordogan, taasoo u baahan ogolaansho ay bixiso xukuumadda Jarmalka si ay u dacweeyeen.
Xiriirka labada dal ayaa qarka u saarmay inuu xumaado, laakiin Ra’iisal wasaaraha Angela Merkel ay xalay ku dhawaaqday inay xukuumadiisa ogolaatay inay Turkigu dacwad ku soo oogo majaajiliistaha Jan Boehmermann, taasoo keentay muran badan oo ka dhashay gudaha dalka Jarmalka iyadoo xisbiga Angela Markel ku kala qeybsamay arrintan.
Siyaasiyiin badan oo Jarmal ah ayaa cambaareeyay go’aanka xukuumadda Jarmalka oo ku soo beegmay xilli Jarmalka u baahan tahay taageerada Turkiga si looga hortago qaxootiga Suuriya ee ku qulqulaya dalalka Yurub.
Turkiga ayaa adeegsaneysa qodobka 103 ee xeerka ciqaabta dalka Jarmalka oo marna la isticmaalin, kaasoo dembi ka dhibaya in la caayo hay’ado ama mas’uuliyiinta dalalka dibadda, waxaana sharcigan ay balan qaaday Ra’iisal wasaare Merkel in wax laga bedeli doono sanadka 2018.
Majaajiliistaha reer Jarmal ee waxan oo dhibaato ah sameeyay Jan Bohermann wuxuu sheegay inuu ku jeesjeesay madaxweynaha Turkiga taasina ay tahay mid caadi ah oo xoriyadda hadalka ka mida
Madaxweynaha Turkiga wuxuu dalbaday in maxkamad la soo taago Bohermann si loogu qaado dacwad ah inuu gabay aflagaado ah ka tiriyay isaga kaasoo gef iyo caay ku ah sharafta madaxweyne dowlad kale.
XULASHADA GOOBJOOGE.COM
