Sicirka saxiixa mooshinka lagu ridayo Ra’iisal wasaaraha xukuumada Soomaaliya C/weli Sheekh Axmed ayaa lagu bixinayaa qiime gaaraya $3000. kadib markii si toos ah loo bilaabay ololaha ridista xukuumadda oo uu hormuud u yahay madaxweyne Xasan Sheekh Maxamuud.
In ka badan 55 xildhibaan oo loogu baahan yahay inay soo jeediyaan kalsooni kala noqoshada xukuumadda ayaa la sheegay inay heleen shalay ilaa xalay labada nin ee u xil saaran inay kharashka bixiyaan si loo helo tiro badan oo xildhibaanno ah oo saxiixa mooshinka la filayo in Baarlamaanka la geeyo toddobaadkan.
Nin la dhashay madaxweynaha oo lagu magacaabo Cali Sheekh iyo xildhibaan lagu magacaabo Cali Ganey ayaa qaabilsan inay lacagaha laaluushka siiyaan xildhibaannada iyagoo ku shaqeynaya oo saxiixa iyo kharash siintuna ka dhacayaan Hotelka Centrale iyo Guri uu ku shaqeeyo xildhibaan Cali Ganey oo ku yaala albaabka madaxtooyada laga galo.
Xogta ay heleyso Wadani.com ayaa sheegeysa in marka la siiyo xildhibaanka lacagta qeybta hore ee ah $3000 laga sawirayo aqoonsigiisa liisna laga qorayo, iyadoo kadibna loo balanqaadayo in la siin doono $2000 kale marka kalsoonida lagala noqdo oo la rido xukuumadda Ra’iisal wasaare C/weli.
Madaxweynaha ayaa la sheegay inuu amar ku bixiyay in qorshaha lagu soo afjaro muddo aan ka badneyn saddex maalmood si degdeg looga fara xasho arrinta ra’iisal wasaaraha. taasoo u muuqata inay xowli ku socoto.
wixii kasoo kordha kala soco www.goobjooge.com
