Wararka laga helayo Garoonka Diyaaradaha magaalada Muqdisho ayaa sheegaya in Senatoro ka tirsan Aqalka Sare ee Baarlamaanka maanta lagu xayiray Garoonka, iyadoo laga reebay diyaarad ku socotay magaalada Kismaayo.
Senatorada C/llaahi Sheekh Ismaaciil (Fartaag) iyo Iftiin Xasan Baasto ayaa laga reebay diyaarad ku socotay magaalada Kismaayo, iyadoo ka qeybgeli lahaa aaska Wasiirkii hore ee Waxbarashada Jubbaland Macalin Maxamed Ibraahim oo ka dhacaya Magaalada Kismaayo.
Senator Fartaag ayaa sheegay in diyaaradii siday Meydka Wasiirka ay soo martay Addis, maantana ay timid magaalada Muqdisho, iyaguna ay Kismaayo ugu socdeen aaska Wasiirka Waxbarashada Jubbaland isagoo ka mid ahaa siyaasiyiin iyo dad badan oo kusii jeeday Kismaayo.
“Waxaa dhacday markii aan garoonka tagtay ee diyaaradii nala saalay inuu sarkaal Nabadsugid ah amar ku siiyey diyaaradda in ka damiyo, dadka saaranna ay kasoo degaan…” ayuu yiri Senator Fartaag oo sheegay in markii meelo badan lala xiriiray ay caddaatay sababta diyaaradda loo hor istaagay.
Wuxuu Senator-ka sheegay in wadahadal iyo dood kadib lagu wargeliyey diyaaradda inaysan dhoofi karin haddii aan dadka raacaya laga reebin Senatorada C/llaahi Fartaag iyo Iftiin Xasan Baasto.
Senator Fartaag ayaa caddeeyay in amarka looga reebay diyaaradda ku socotay magaalada Kismaayo uu ka yimid Nabadsugidda iyo Wasiirka Duulista xukuumadda Soomaaliya, isagoo nasiib darro ku tilmaamay in dowladda ay ku mashquusho siyaasi mucaarad ah oo aas u socday.
