Madaxweynaha Soomaaliya Maxamed C/llaahi Farmaajo ayaa markii ugu horeysay ka jawaabay su’aalo ay dadka caadiga ah weydiiyeen intii uu xilka hayey ku dhowaad 4 sano, waxaana Madashaasi oo uu qabanqaabiyey Machadka RAAS, kana dhacday madaxtooyada ay u muuqatay mid dadka Goobta ku sugan la diyaariyey.
Madaxweyne Farmaajo oo ka jawaabay su’aalo badan, halka su’aalo kale uu si ku-talogal ah uga booday, qaarna uu caddeeyay inuusan ka jawaabi karin, qaarna uu ka gaabsaday; Haddaba waxaan halkan kusoo bandhigeynaa su’aalaha ugu muhiimsanaa ee madaxweyne Farmaajo iska dhega mariyey iyo kuwii uu ka gaabsaday:
1- Arrinta Qalbi-dhagax iyo ONLF: Wuxuu wiil dhalinyaro ah weydiiyey inuu diyaar u yahay Cudurdaar uu siiyo Qalbi-dhagax iyo in liiska argagixisada laga saaro ONLF, laakiin Madaxweynaha sooma hadal qaadin, xiriiriyuhuna wuxuuba ku dooday inaysan ka mid ahayd Mowduuca.
2- Musuqmaaasuqa Doorashada ka dhici kara: Wiil kale ayaa weydiiyey Madaxweyne Farmaajo inuu damaad qaadayo in ragga wasiirada iyo xildhibaanadii hore ee kasoo jeeda Somaliland aysan awoodda iyo hantida dowladda u adeegsan inay dib ugu soo laabtaan kuraastooda?, su’aashaasina madaxweynaha waa ka booday si kutalogal ah.
3- Metelaadda G/Banaadir ee Aqalka Sare: Waxay ahayd su’aal kale oo la weydiiyey Madaxweynaha halka ay ku danbeeyeen 13-kii xubnood ee Aqalka Sare laga siiyey Gobolka Banaadir, Jawaabtii Madaxweynaha waxay noqotay in la weydiiyo Guddoomiyeyaasha labada Aqal ee Baarlamaanka.
4- Sool iyo Sanaag. Gabar ayaa Madaxweynaha weydiisay qaabka loo dooranayo xildhibaannada Federaalka ee kaso jeeda Gobollada Sool iyo Sanaag, iyo sababta magaalada Muqdisho loogu dooran waayey?, Jawaabta madaxweynaha waxay noqotay: “Su’aashaadu waa adagtahay kama jawaabi karo.. raali ahow”
5- Su’aal kale dad badan ogyihiin balse la weydiiyey waxay ahayd ee Inuu mar kaleMusharax yahay? , wuxuuna ka gaabsadya inuu is caddeeyo, isagoo yiri:”Waqtigeeda ayaan ka jawaabayaa”
6- Faragelinta Kenya: – Madaxweynaha wuxuu ka gaabsay ama si kulatalogal ah uga booday su’aalo kale oo ay ugu weyn tahay faragelinta ay Kenya ku heysto Gobolka Gedo, waxaa kaloo uu ka meermeeray dagaalka Alshabaab ee uu sheegay inuu 2 sano kusoo af-jarayo iyo in mas’uuliyiinta kasoo jeeda Somaliland laga talogleiyey heshiiskii Doorashada.
Qabanqaabiyeyaasha madashaan oo looga dan lahaa in madaxweynaha olole loogu sameeyo ayaa bannaanka soo dhigtay sababihii mudadda dheer looga hortaagnaa inuu si toos ah saxaafadda u hor yimaado, waxayna qiimeynteenu noqotay in bandhiggaasi saameynta uu yeeshay ay ka qaasaare badan tahay faa’iidadiisa, waxaana kulankaasi oo dhan isku fuuqsatay su’aashii Sool iyo Sanaag oo si weyn loogu hadal hayo Baraha bulshada saameyn xunna ku yeela doonta musharnimadiisa.
